“தமிழக பெண்களின் கண்ணீர் சாபம்”…. திமுக தோல்விக்கான அந்த 2 ரகசிய காரணங்கள்…. லாசரஸ் உடைத்த அதிர்ச்சி உண்மை….!

தமிழகச் சட்டசபைத் தேர்தலில் ஆளுங்கட்சியான திமுக, நடிகர் விஜய்யின் தமிழக வெற்றிக் கட்சியிடம் தோல்வியைத் தழுவி ஆட்சியைப் பறிகொடுத்துள்ளது. இந்த எதிர்பாராத வீழ்ச்சிக்குப் பிறகு, திமுக தலைவர் மு.க.ஸ்டாலின் கட்சியை மீண்டும் பலப்படுத்தும் நோக்கில், தோல்விக்கான காரணங்களை ஆராய மாவட்ட வாரியாகத் தனிக்குழுக்களை அமைத்து தொண்டர்கள் மற்றும் பொதுமக்களிடம் கருத்துக்களைக் கேட்டு வருகிறார். இந்நிலையில், ‘இயேசு விடுவிக்கிறார்’ ஊழியத்தின் நிறுவனர் மோகன் சி. லாசரஸ் வெளியிட்டுள்ள வீடியோ பதிவு, தமிழக அரசியல் வட்டாரத்தில் தற்போதைய பேசுபொருளாக மாறியுள்ளது.

எந்தவொரு அரசியல் கட்சியையும் சாராத ஒரு பொதுமகனாக மு.க.ஸ்டாலினுக்குத் தனது கருத்துக்களைப் பகிர்வதாகக் குறிப்பிட்டுள்ள மோகன் சி. லாசரஸ், திமுகவின் தோல்விக்கு முதலாவது முக்கியக் காரணமாக ‘டாஸ்மாக்’ மதுபானக் கடைகளைச் சுட்டிக்காட்டியுள்ளார். தமிழகத்தில் மதுப்பழக்கத்தால் கோடிக்கணக்கான மக்கள் சீரழிந்து வருவதாக நீதிமன்றமே வேதனை தெரிவித்துள்ளதைக் குறிப்பிட்ட அவர், கடந்த பத்தாண்டுகளில் மதுவினால் குடும்பங்கள் உடைந்து, ஏராளமான பெண்கள் விதவைகளாகவும், குழந்தைகள் ஆதரவற்றவர்களாகவும் மாறியுள்ளதாகக் கண்ணீருடன் தெரிவித்துள்ளார். கொரோனா காலத்தில் கடைகள் மூடப்பட்டபோது பலர் இப்பழக்கத்திலிருந்து மீண்டதை நினைவுகூர்ந்து, மதுக்கடைகளை மூடினால் பாதியளவு மக்கள் நல்வழிப்படுவர் என்றும், பெண்களின் இந்த வராத கண்ணீரே தேர்தலில் எதிரொலித்துள்ளது என்றும் அவர் கூறியுள்ளார்.

தோல்விக்கான இரண்டாவது முக்கியக் காரணமாக அரசு அலுவலகங்களில் தலைவிரித்தாடும் ‘லஞ்சம்’ குறித்து அவர் மிகக் கடுமையான விமர்சனங்களை முன்வைத்துள்ளார். ஒரு காலத்தில் தவறு செய்பவர்களிடம் மட்டுமே லஞ்சம் வாங்கப்பட்ட நிலை மாறி, இன்று தொண்ணூறு சதவீத அதிகாரிகள் சட்டப்பூர்வமான மற்றும் நேர்மையான கோப்புகளுக்குக் கூட லஞ்சம் கேட்கும் அவலம் நிலவுவதாகக் குற்றம் சாட்டியுள்ளார். இதனால் அடித்தட்டு மற்றும் நடுத்தர ஏழை மக்கள் சொல்லொணாத் துயரத்திற்கு ஆளாகியுள்ளனர் என்றும், இந்த நிர்வாகச் சீர்கேடே மக்களிடையே பெரும் அதிருப்தியை ஏற்படுத்தி அரசியல் மாற்றத்திற்கு வழிவகுத்துள்ளது என்றும் அவர் விளக்கியுள்ளார்.

மேலும், இந்த லஞ்சக் கலாச்சாரத்தின் பின்னணியில் அரசியல்வாதிகள் இருப்பதாகப் பொதுமக்கள் நம்புவதாகவும், லஞ்சம் வாங்கும்போது சட்டமன்ற உறுப்பினர்கள், அமைச்சர்கள் மற்றும் முதலமைச்சர் வரை பங்கு கொடுக்க வேண்டும் என்று அதிகாரிகள் தரப்பில் கூறப்படுவதாகவும் அதிர்ச்சியூட்டும் தகவலைப் பகிர்ந்துள்ளார். இது எந்தளவுக்கு உண்மை என்று தனக்குத் தெரியாவிட்டாலும், ஊழல் விவகாரத்தில் மக்கள் ஆட்சியாளர்களை நோக்கியே கைகாட்டுகிறார்கள் என்பதை மு.க.ஸ்டாலினுக்குத் தெளிவுபடுத்தியுள்ளார். இதனை ஒடுக்க அரசு தவறிவிட்டதாகக் கருதும் மோகன் சி. லாசரஸ், மக்களின் இந்த உண்மையான மனவேதனையையும் அபிப்பிராயத்தையும் உணர்ந்து திமுக தலைமை வரும் காலங்களில் திருத்திக் கொள்ள வேண்டும் என்று வலியுறுத்தியுள்ளார்.