கர்நாடக மாநிலத்தில் கோவில் தரிசனத்தின் போது, பாஜக சட்டமன்ற உறுப்பினரின் மகள் பெண் காவல் அதிகாரியை கன்னத்தில் அறைந்த சம்பவம் சமூக வலைத்தளங்களில் பரவி பெரும் அதிர்ச்சியை ஏற்படுத்தியுள்ளது. மாண்டியா மாவட்டம் ஸ்ரீரங்கப்பட்டணா அருகே உள்ள ஆரத்தி உக்கடா கோவிலில் கடந்த ஆகஸ்ட் 12-ஆம் தேதி ஆடி அமாவாசை சிறப்பு வழிபாடு நடைபெற்றது. அப்போது ஏற்பட்ட மக்கள் கூட்டத்தைக் கட்டுப்படுத்தக் காவல் உதவி ஆய்வாளர் சவிதா பி. பாட்டில் தலைமையில் காவல்துறையினர் பாதுகாப்புப் பணியில் ஈடுபட்டிருந்தனர்.
அந்நேரத்தில், துமகூரு ஊரகத் தொகுதி பாஜக சட்டமன்ற உறுப்பினர் பி. சுரேஷ் கவுடாவின் மகள் ஐஸ்வர்யா விஐபி வரிசையில் தரிசனத்திற்காக வந்துள்ளார். கருவறைக்குள் சென்று சாமி தரிசனம் செய்ய அனுமதிக்குமாறு பணியிலிருந்த உதவி ஆய்வாளர் சவிதாவிடம் அவர் கோரியுள்ளார். அதற்கு சவிதா மறுப்பு தெரிவிக்கவே, இருவருக்கும் இடையே கடுமையான வாக்குவாதம் ஏற்பட்டது. இதில் ஆத்திரமடைந்த ஐஸ்வர்யா, சற்றும் எதிர்பாராத விதமாக பெண் அதிகாரி சவிதாவின் கன்னத்தில் அறைந்தார். உடனடியாக அந்த பெண் அதிகாரியும் பதிலுக்கு அவரை அறைந்ததால் அங்கு பெரும் பரபரப்பு நிலவியது.
இந்த மோதலைத் தொடர்ந்து, அங்கிருந்தவர்கள் இருவரையும் தடுத்து நிறுத்திச் சமாதானப்படுத்தி அனுப்பி வைத்தனர். பின்னர், பணி செய்யவிடாமல் தடுத்து தாக்குதல் நடத்திய ஐஸ்வர்யா மீது உதவி ஆய்வாளர் சவிதா க்யாத்தனஹள்ளி காவல் நிலையத்தில் புகார் அளித்துள்ளார். மற்றொரு காவல் அதிகாரியைக் கருவறைக்குள் அனுமதித்த சவிதா, தான் ஒரு எம்.எல்.ஏ-வின் மகள் எனக் கூறியும் தன்னைக் கருவறைக்குச் செல்ல அனுமதிக்காததே இந்த மோதலுக்குக் காரணம் எனத் தெரியவந்துள்ளது.
இச்சம்பவத்தின் வீடியோ வெளியாகி இணையத்தில் வைரலானதைத் தொடர்ந்து, தனது மகளின் செயலுக்கு எம்.எல்.ஏ. சுரேஷ் கவுடா வருத்தம் தெரிவித்து மன்னிப்பு கோரியுள்ளார். கோவிலுக்கு அனைவரும் அமைதியை நாடியே செல்கின்றனர் என்றும், அதேவேளையில் தனது மகளைப் பெண் அதிகாரி வாய்மொழியாகத் திட்டியதாகவும் அவர் குறிப்பிட்டுள்ளார். இச்சம்பவம் குறித்து காவல்துறையினர் வழக்குப்பதிவு செய்து தொடர்ந்து விசாரணை நடத்தி வருகின்றனர்.