அதிமுகவின் முக்கிய நிர்வாகியான சி.வி.சண்முகத்தின் ஆதரவாளர்கள் 100 பேர் சமீபத்தில் கட்சியிலிருந்து நீக்கப்பட்ட சம்பவம் தமிழக அரசியலில் பெரும் பரபரப்பை ஏற்படுத்திய நிலையில், அவரது ஆதரவாளரும் பண்ருட்டி சட்டமன்ற உறுப்பினருமான மோகன், சேலத்தில் உள்ள எடப்பாடி பழனிசாமியின் இல்லத்தில் அவரை நேரில் சந்தித்துப் பேசியுள்ளது தற்போதைய முக்கியப் பேசுபொருளாக மாறியுள்ளது.
இச்சந்திப்பிற்குப் பிறகு செய்தியாளர்களைச் சந்தித்த எம்.எல்.ஏ மோகன், “இளைஞர்களுக்குக் கட்சியின் சார்பு அணிகளில் தொடர்ந்து வாய்ப்புகளையும் பதவிகளையும் வழங்கி ஊக்குவித்து வரும் எடப்பாடியாரின் கட்டளைக்குக் கட்டுப்பட்டு, அவரது வழிநடத்துதலில் தீவிரமாகச் செயல்பட நாங்கள் முழுமையாகத் தயாராக இருக்கிறோம்” எனத் தெரிவித்து, தனது அரசியல் நிலைப்பாட்டை வெளிப்படையாக உறுதிப்படுத்தியுள்ளார்.