அவ்ளோதான் மொத்தமா முடிச்சுவிட்டீங்க… ஒரே வரியில் தவெக பர்னிச்சரை சல்லி சல்லியா நொறுக்கிய ஸ்டாலின்…!

தமிழக சட்டமன்றத் தேர்தல் களம் வரும் ஏப்ரல் 23-ஆம் தேதி நடைபெறவுள்ள வாக்குப்பதிவை முன்னிட்டு தற்போதே அனல் பறக்கத் தொடங்கியுள்ளது. திமுக, அதிமுக, நாம் தமிழர் ஆகிய கட்சிகள் தீவிரப் பிரச்சாரத்தில் ஈடுபட்டு வரும் நிலையில், தமிழக வெற்றிக் கழகத்தின் தலைவர் விஜய் முன்வைக்கும் கருத்துக்கள் விவாதப் பொருளாகியுள்ளன. இந்தச் சூழலில், ராமநாதபுரம் மாவட்டம் பரமக்குடியில் இன்று காலை நடைபயிற்சி மேற்கொண்டவாறே பொதுமக்களைச் சந்தித்த முதலமைச்சர் மு.க. ஸ்டாலின், தேர்தல் களம் மற்றும் எதிர்க்கட்சிகளின் விமர்சனங்கள் குறித்துச் செய்தியாளர்களிடம் மனம் திறந்து பேசினார்.

அதிமுக மற்றும் பாஜகவின் கூட்டணிச் செயல்பாடுகள் குறித்து விமர்சித்த முதலமைச்சர், அதிமுகவின் முகமூடியைப் போட்டுக்கொண்டுதான் பாஜக தமிழ்நாட்டிற்குள் நுழையப் பார்க்கிறது என்று சாடினார். இது தமிழ்நாட்டிற்கும் டெல்லிக்குமான தேர்தல் என்று குறிப்பிட்ட அவர், எடப்பாடி பழனிசாமி தோல்வி பயத்தால் திமுக மீது அவதூறு பரப்பி வருவதாகவும், ஆனால் மக்கள் இதனைப் பொருட்படுத்தாமல் திமுகவுக்கே வாக்களிக்கத் தயாராக இருப்பதாகவும் உறுதிபடத் தெரிவித்தார். தேர்தல் ஆணையத்தின் செயல்பாடுகள் குறித்து ஏற்கனவே புகாரளிக்கப்பட்டுள்ளதையும் அவர் சுட்டிக்காட்டினார்.

குறிப்பாக, தமிழக அரசியலில் தற்போதைய பேசுபொருளாக இருக்கும் நடிகர் விஜய்யின் அரசியல் வருகை மற்றும் “திமுகவுக்கும் தவெகவுக்கும் இடையேதான் போட்டி” என்ற விஜய்யின் கருத்து குறித்த கேள்விக்கு ஸ்டாலின் மிகச் சுருக்கமாகப் பதிலளித்தார். “அதைப் பற்றி எல்லாம் நான் பேசத் தயாராக இல்லை… நோ கமென்ட்ஸ் (No Comments)” என்று அவர் ஒற்றை வரியில் அளித்த பதில் சமூக வலைதளங்களில் வைரலாகி வருகிறது. அதேபோல், ‘ஜனநாயகன்’ திரைப்படக் கசிவு விவகாரம் குறித்த கேள்விகளுக்கும் “நான் இதற்கெல்லாம் பதிலளிக்க வேண்டிய அவசியமில்லை” எனத் தவிர்த்துவிட்டார்.

விசிக நிர்வாகி ஆதவ் அர்ஜுனா முன்வைத்த விமர்சனங்கள் குறித்துக் கேட்கப்பட்டபோது, “ஆதவ் அர்ஜுனா பற்றிய செய்திகளை நான் படிப்பதில்லை” என்று கூலாகப் பதிலளித்துவிட்டுத் தனது பிரச்சாரத்தைத் தொடர்ந்தார் முதலமைச்சர். ஸ்டாலினின் இந்த “நோ கமென்ட்ஸ்” பாணி பதில்கள் ஒருபுறம் திமுகவினரால் கொண்டாடப்பட்டாலும், தவெக ஆதரவாளர்கள் இதற்குத் தங்களது கண்டனங்களையும் எதிர்வினைகளையும் இணையத்தில் பதிவு செய்து வருகின்றனர். இதனால் தமிழக அரசியல் களம் மேலும் சூடுபிடிக்கத் தொடங்கியுள்ளது.