தமிழ்நாடு சட்டமன்றத்தில் முதலமைச்சர் விஜய், மிசா காலம் குறித்துப் பேசுகையில் காட்டிய உடல்மொழி சர்ச்சையை ஏற்படுத்தியதாகக் கூறி, திமுக சார்பில் மாநிலம் தழுவிய ஆர்ப்பாட்டங்கள் நடத்தப்பட்டன. சென்னை சைதாப்பேட்டையில் நடைபெற்ற கண்டன ஆர்ப்பாட்டத்தில் கலந்துகொண்ட திமுக எம்பி ஆ.ராசா, தமிழக வெற்றிக் கழகத்தின் அமைச்சரான சி.டி.ஆர். நிர்மல் குமாரின் பிறப்பு குறித்து மிகக் கடுமையான மற்றும் தனிப்பட்ட முறையில் இழிவுபடுத்தும் வகையிலான கருத்துக்களைத் தெரிவித்தார். எடப்பாடி பழனிசாமி மீதான பழைய விமர்சனங்களைப் போலவே, நிர்மல் குமார் குறித்தும் ஆ.ராசா பேசிய இந்த அவதூறான பேச்சு தற்போது தமிழக அரசியலில் பெரும் புயலைக் கிளப்பியுள்ளது.
ஆ.ராசாவின் இந்த எல்லை மீறிய பேச்சைக் கண்டித்து விடுதலைச் சிறுத்தைகள் கட்சியின் துணைப் பொதுச்செயலாளர் வன்னி அரசு தனது சமூக வலைத்தளப் பக்கத்தில் மிகக் கடுமையான கண்டனப் பதிவை வெளியிட்டுள்ளார். பேரறிஞர் அண்ணா முன்வைத்த ‘கடமை, கண்ணியம், கட்டுப்பாடு’ எனும் உயரிய முழக்கத்தை மறந்த திமுக, தற்போது வன்மம், வெறுப்பு மற்றும் ஆற்றாமையால் நிரம்ப வழிகிறதோ என்ற அய்யம் எழுவதாக அவர் சாடியுள்ளார். மேலும், மூத்த தலைவரான ஆ.ராசாவும், சேகர் பாபுவும் பேசும் மேடைப் பேச்சுகள் அவர்களின் அரசியல் விரக்தியையே வெளிப்படுத்துவதாகக் குறிப்பிட்டுள்ளார்.
பெண்களை இழிவுபடுத்தும் வகையில் “நீ யாருக்கு பிறந்தாய்?” என மேடையில் கேள்வி எழுப்புவது நாகரிகமான அரசியலுக்கு அழகல்ல என்று சுட்டிக்காட்டிய வன்னி அரசு, அந்தப் பேச்சின் போது மேடையிலிருந்த எம்பி தமிழச்சி தங்கப்பாண்டியன் கூச்சத்தில் தலைகவிழ்ந்த நிலையை நினைவூட்டியுள்ளார். இதேபோல் சேகர் பாபு முதலமைச்சரைப் பற்றிப் பேசிய இழிவான வார்த்தைகளை திமுக ஆதரவு ஊடகங்கள் ‘பீப்’ ஒலி எழுப்பி மறைக்க வேண்டிய அவலம் ஏற்பட்டுள்ளதையும் அவர் அம்பலப்படுத்தியுள்ளார்.
முன்னதாக கனிமொழி எம்பி குறித்து பாஜகவின் எச்.ராஜாவும், நாம் தமிழர் கட்சியின் சீமானும் இழிவாகப் பேசிய போது உடனடியாகக் குரல் கொடுத்துக் கண்டித்த இயக்கம் விடுதலைச் சிறுத்தைகள் என்பதை நினைவுகூர்ந்த அவர், அதேபோன்ற தரமற்ற பேச்சை தற்போது பேசும் ஆ.ராசாவிற்கும் எச்.ராஜாவிற்கும் இடையே என்ன வித்தியாசம் இருக்கிறது என்ற காரசாரமான கேள்வியை முன்வைத்துள்ளார். மாற்றுக்கட்சியினரின் விமர்சனங்களுக்கு அரசியல் ரீதியாகப் பதிலளிக்காமல், பிறப்பு குறித்துப் பேசி பெண்களை அவமதிக்கும் திமுக பேச்சாளர்களின் போக்கைக் கண்டிக்கத் தவறமாட்டோம் என்பதை வன்னி அரசின் இந்தக் கண்டனம் தெளிவாக உணர்த்துகிறது.