“எடப்பாடி கோட்டையில செந்தில் பாலாஜி ஸ்கெட்ச்…” அதிமுக-வை ஆஃப் செய்ய திமுக போட்ட மெகா பிளான்…!!

கோவை மாவட்டத்தில் அதிமுகவின் நீண்டகால ஆதிக்கத்திற்கு முற்றுப்புள்ளி வைக்க, திமுக சார்பில் அமைச்சர் செந்தில் பாலாஜி அதிரடி தேர்தல் வியூகங்களை வகுத்து வருகிறார். கடந்த 2021 தேர்தலில் கோவையின் 10 தொகுதிகளையும் அதிமுக கைப்பற்றிய நிலையில், இந்த முறை குறைந்தது 5 இடங்களையாவது திமுக பக்கம் கொண்டு வருவோம் என அவர் தலைமைக்கு உறுதி அளித்துள்ளார். குறிப்பாக கோவை தெற்கு தொகுதியில் முகாமிட்டுள்ள அவர், கமல்ஹாசன் உள்ளிட்ட கூட்டணிக் கட்சித் தலைவர்களைத் தொடர்ச்சியாகக் களமிறக்கி அதிமுகவினரைத் திகைக்க வைத்துள்ளார்.

இரட்டை இலை சின்னத்தின் பலம் வாய்ந்த கொங்கு மண்டலத்தில், திமுகவின் வாக்கு வங்கியை அதிகரிக்க செந்தில் பாலாஜி தொகுதி வாரியாக நுணுக்கமான திட்டங்களைச் செயல்படுத்தி வருகிறார். பண விநியோகம் மற்றும் பரிசுப் பொருட்கள் வழங்குவதில் அதிமுகவை விட இருமடங்கு வேகம் காட்டத் தயாராகி வருவதால், தேர்தல் களம் சூடுபிடித்துள்ளது. செந்தில் பாலாஜியின் இந்தத் தீவிரமான செயல்பாடுகளால் தங்களது கோட்டை சரியுமோ என்ற அச்சத்தில் அதிமுகவினர் உள்ள நிலையில், வரும் ஏப்ரல் 23-ஆம் தேதி நடைபெறும் வாக்குப்பதிவு கோவையின் அரசியல் தலையெழுத்தைத் தீர்மானிக்கும்.