தமிழகத்தில் தவெக ஆட்சியில் தகவல் தொழில்நுட்பத் துறை அமைச்சராகப் பொறுப்புவகிக்கும் சி.டி.ஆர்.நிர்மல்குமார், சென்னையில் செய்தியாளர்களைச் சந்தித்தபோது திராவிடக் கட்சிகளான திமுக மற்றும் அதிமுகவின் தற்போதைய அரசியல் நகர்வுகளைக் கடுமையாக விமர்சித்துள்ளார். தவெக ஆட்சி இன்னும் ஆறு மாதங்களில் கவிழும் என திமுகவின் அனிதா ராதாகிருஷ்ணனும், மு.க.ஸ்டாலினுக்குக் கோபம் வந்தால் ஆட்சி நிலைக்காது என அதிமுகவின் முன்னாள் அமைச்சர் கே.டி.ராஜேந்திர பாலாஜியும் பேசியிருப்பது, இவ்விரு கட்சிகளும் திரைமறைவில் கூட்டணி வைக்க முயல்கின்றனவோ என்ற ஐயத்தை எழுப்புவதாகக் குறிப்பிட்டுள்ளார். இவர்கள் இருவரும்தான் அந்தப் புதிய கூட்டணி முயற்சியின் தூதர்களாகச் செயல்படுகிறார்கள் போலத் தெரிகிறது என்றும், தென் மாவட்டங்களில் அதிமுக கிளைக் கழகங்கள் மட்டத்திலேயே முற்றிலுமாக அழிந்துவிட்டதாகவும் அவர் சாடியுள்ளார்.
மேலும், தற்போதைய தவெக ஆட்சியில் அதிகமாகக் குதிரைப்பேரம் நடப்பதாக இந்திய கம்யூனிஸ்ட் கட்சியின் பொதுச்செயலாளர் வீரபாண்டியன் மற்றும் திமுகவின் ஆர்.எஸ்.பாரதி ஆகியோர் சுமத்தியுள்ள குற்றச்சாட்டுகளை அவர் முற்றிலுமாக மறுத்துள்ளார். வேறு கட்சிகளில் இருந்து விலகித் தவெக-வில் இணைவது என்பது மக்கள் பிரதிநிதிகளின் தனிப்பட்ட விருப்பமே தவிர, அது குதிரைப்பேரம் ஆகாது என்றும், மாறாக திமுகவின் செந்தில் பாலாஜி தரப்பினர்தான் அத்தகைய சட்டவிரோத செயல்களில் சிக்கியுள்ளனர் என்றும் அவர் பதிலடி கொடுத்துள்ளார். சிபிஐ மற்றும் ஆளுநருக்கு திமுக கடிதம் எழுதுவது வெறும் நேரத்தைக் கடத்துவதற்கான ஒரு நாடகம் மட்டுமே என்றும், தவெக அரசின் மீது சேறுபூச திமுகவும் அதிமுகவும் கூட்டாக முயன்று வருவதாகவும் அமைச்சர் நிர்மல்குமார் குற்றம் சாட்டியுள்ளார்.