கோட் சூட் போட்டா என்ன தப்பு..? ஏன் நாங்க எல்லாம் போடக்கூடாதா..? – ட்ரோல்களுக்கு பதிலடி கொடுத்த அமைச்சர் கீர்த்தனா…!!

தமிழக வெற்றிக் கழக ஆட்சியில் சிவகாசி தொகுதியில் வெற்றி பெற்று, தொழில்துறை அமைச்சராகப் பொறுப்பேற்றுள்ள இளம் அமைச்சர் கீர்த்தனா, சமூக ஊடகங்களில் தம்மீது வைக்கப்படும் விமர்சனங்கள் மற்றும் கேலிப்பேச்சுகள் குறித்து மனம் திறந்துள்ளார். கோட் அணிந்து அவர் தொழில் முதலீடுகள் குறித்துப் பேசிய வீடியோ கடுமையாக ட்ரோல் செய்யப்பட்ட நிலையில், வார்த்தை அரசியலைத் தாண்டி உடை அரசியலுக்குச் சென்றுவிட்ட சிலரால் இதை ஏற்றுக்கொள்ள முடியவில்லை என்று அவர் சுட்டிக்காட்டியுள்ளார். “நாங்கள் எல்லாம் கோட் போடக்கூடாதா?” என்று தவெக தலைவர் விஜய் கேட்ட கேள்வியையே தாமும் கேட்பதாகக் கூறியுள்ள அவர், இத்தகைய கேலிப்பேச்சுகளைப் பற்றிக் கவலைப்படாமல் தொடர்ந்து மக்கள் பணிகளில் கவனம் செலுத்தி வருவதாகத் தெரிவித்துள்ளார்.

அரசு உதவிபெறும் பள்ளியில் படித்து, இன்று அமைச்சரவையில் தமக்கு இவ்வளவு பெரிய வாய்ப்பை வழங்கிய முதலமைச்சர் விஜய் அண்ணாவுக்குத் தனது நன்றியையும் பெருமையையும் கீர்த்தனா உரித்தாக்கியுள்ளார். ஊழலற்ற ஆட்சியை மக்கள் விரும்பியதால், தேர்தல் முடிந்த அடுத்த கணமே எந்தவொரு கொண்டாட்டமும் இல்லாமல், குடும்பத்தினருடன் கூட நேரம் செலவிடாமல் சிவகாசி, சென்னை எனத் தொடர்ந்து ஓடிக்கொண்டே இருப்பதாகக் குறிப்பிட்டுள்ளார். மக்கள் கையில் அதிகாரம் கிடைக்கும்போது மாற்றங்கள் அழகாக மாறும் என்றும், தவெகவின் இந்த ஆட்சி இந்தியாவிலேயே ஒரு மிகப்பெரிய வரலாற்று மாற்றம் என்றும் அவர் பெருமிதத்துடன் தெரிவித்துள்ளார்.

ஒரு பெண்ணாகத் தான் எதிர்கொள்ளும் சவால்கள் மற்றும் கேலிகள் குறித்துப் பேசிய அவர், ஆரோக்கியமான விமர்சனங்கள் இருந்தால் அதை ஏற்றுத் தன்னை மாற்றிக் கொள்ளத் தயாராக இருப்பதாகக் கூறியுள்ளார். மற்ற எதிர்மறை விமர்சனங்களைக் கண்டு கொள்ளாமல், அவற்றையே தமக்கு உத்வேகமாக மாற்றி, மக்களுக்காக மேலும் உழைக்கப் போவதாகத் திட்டவட்டமாகத் தெரிவித்துள்ளார். “நான் இன்னும் கற்றுக் கொண்டிருக்கிறேன், அதைச் செயல்படுத்தி என்னை நான் நிரூபிப்பேன்” என்று கூறியுள்ள அமைச்சர் கீர்த்தனா, மக்களுக்கு நல்லது செய்ய வேண்டும் என்ற ஒற்றை நோக்கத்திற்காகவே அரசியலுக்கு வந்ததாகத் தனது உறுதியை வெளிப்படுத்தியுள்ளார்.