வேலூரில் செய்தியாளர்களைச் சந்தித்த தமிழக கைத்தறி மற்றும் துணிநூல் துறை அமைச்சர் காந்தி, நடிகர் விஜய் குறித்து எழுப்பப்பட்ட கேள்விக்கு மிகவும் உற்சாகமாகவும் கலகலப்பாகவும் பதிலளித்துள்ளார். விஜய்யின் வேலூர் வருகை குறித்துப் பேசிய அவர், தனிப்பட்ட முறையில் தனக்கு விஜய்யை மிகவும் பிடிக்கும் என்று ஓப்பனாகத் தெரிவித்துள்ளார்.
விஜய்யின் திரை ஆளுமை குறித்துப் பாராட்டிய அமைச்சர், அவர் படங்களில் “நல்லா கை நீட்டுவார், சட்டையை மடிச்சு விடுவார்” என்று அவரது பாணியைக் கிண்டலாகவும் ரசித்தும் பேசினார். இருப்பினும், சினிமா என்பது வேறு, அரசியல் என்பது வேறு என்று குறிப்பிட்ட அவர், இரண்டையும் போட்டுக் குழப்பிக்கொள்ளத் தேவையில்லை என்பதைச் சுட்டிக்காட்டினார்.
தொடர்ந்து பேசிய அமைச்சர் காந்தி, தமிழகத்தில் திமுக ஆட்சி மிகச் சிறப்பாக நடைபெற்று வருவதாகக் கூறினார். யாருமே குறை சொல்ல முடியாத அளவிற்குத் தமிழக அரசு மக்கள் நலப் பணிகளை முன்னெடுத்து வருவதாகவும், திமுக ஆட்சியின் செயல்பாடுகள் குறித்துப் பெருமிதத்துடன் தனது கருத்துக்களை அவர் பதிவு செய்துள்ளார்.