குஷைகுடா காவல் எல்லைக்கு உட்பட்ட இசிஐஎல் கமலாநகர் பகுதியில் செப்டம்பர் 29-ம் தேதி நள்ளிரவில் அதிர்ச்சியூட்டும் சாலை விபத்து ஒன்று அரங்கேறியுள்ளது. சாலையில் சென்று கொண்டிருந்த பீகார் மாநிலத்தைச் சேர்ந்த 10 பேர் கொண்ட குழுவினர் மீது அடையாளம் தெரியாத வாகனம் ஒன்று பலமாக மோதிவிட்டு நிற்காமல் தப்பியோடியுள்ளது. இந்த கோர விபத்தில் 8 பேருக்கு பலத்த காயம் ஏற்பட்டுள்ள நிலையில், அவர்கள் அனைவரும் இசிஐஎல் பகுதியில் உள்ள சூர்யா எலும்பியல் மருத்துவமனையில் அனுமதிக்கப்பட்டு சிகிச்சை பெற்று வருகின்றனர். இவர்களில் மூன்று பேரின் உடல்நிலை மிகவும் கவலைக்கிடமாக இருப்பதாக தகவல்கள் தெரிவிக்கின்றன.
விபத்தை ஏற்படுத்திய பிறகு, வாகனத்தை நிறுத்தாமல் தப்பியோடிய ஓட்டுநரை பிடிக்கும் பணியில் காவல்துறையினர் தீவிரமாக ஈடுபட்டுள்ளனர். விபத்து நடந்த பகுதியில் பொருத்தப்பட்டிருந்த சிசிடிவி கண்காணிப்பு கேமராக்களில், இந்தச் சம்பவம் தொடர்பான காட்சிகள் தெளிவாகப் பதிவாகியுள்ளன. அந்த வீடியோ பதிவுகளை முக்கிய ஆதாரமாகக் கைப்பற்றியுள்ள போலீசார், தப்பியோடிய வாகன ஓட்டியை அடையாளம் கண்டு அவரை விரைவில் கைது செய்வதற்கான விசாரணையை முடுக்கிவிட்டுள்ளனர்.