சென்னை அண்ணாசாலையில் உள்ள தமிழ்நாடு மின்சார வாரிய தலைமை அலுவலகத்தில், நிலக்கரி கொள்முதல் தொடர்பான முக்கிய ரகசிய தகவல்கள் அடங்கிய ஹார்டு டிஸ்க்குகள் மயமாகி இருப்பது பெரும் பரபரப்பை ஏற்படுத்தியுள்ளது. வாரியத்தின் கணக்கு பிரிவில் வைக்கப்பட்டிருந்த இந்த ஆவணங்கள் மற்றும் கணினி பாகங்கள் திருடு போனது குறித்து மின்சார வாரிய அதிகாரிகள் அதிர்ச்சியடைந்துள்ளனர்.
கடந்த மே மாதம் 16 மற்றும் 17 ஆகிய தேதிகளில், வாரிய அலுவலகத்திற்கு விடுமுறை அளிக்கப்பட்டிருந்த நாட்களைப் பயன்படுத்தி இந்த திருட்டுச் சம்பவம் அரங்கேறியுள்ளதாகக் கூறப்படுகிறது. அலுவலகப் பூட்டை உடைக்காமல், மிகவும் சாதுரியமாக இந்தத் திருட்டு நடத்தப்பட்டிருப்பது பல்வேறு சந்தேகங்களை எழுப்பியுள்ளது.
இது தொடர்பாக மின்சார வாரிய அதிகாரிகள் தரப்பில் சிந்தாதிரிப்பேட்டை காவல் நிலையத்தில் அதிகாரப்பூர்வமாகப் புகார் அளிக்கப்பட்டுள்ளது. இப்புகாரின் அடிப்படையில், காவல்துறையினர் வழக்குப் பதிவு செய்து, மின்வாரிய அலுவலகத்தில் உள்ள சிசிடிவி காட்சிகளை ஆய்வு செய்தும், அங்கு பணிபுரியும் ஊழியர்களிடம் விசாரித்தும் தீவிரமாகப் புலனாய்வு மேற்கொண்டு வருகின்றனர்.