சிஎஸ்கே ரசிகர்களுக்கு டபுள் குஷி.. மேட்ச் டிக்கெட் இருந்தா மெட்ரோவில்… பயணம் முற்றிலும் இலவசம்.. சூப்பர் அறிவிப்பு…!!

சென்னை சேப்பாக்கம் மைதானத்தில் சென்னை சூப்பர் கிங்ஸ் (CSK) மற்றும் சன்ரைசர்ஸ் ஐதராபாத் (SRH) அணிகளுக்கு இடையே நடைபெறும் ஐபிஎல் கிரிக்கெட் போட்டியை நேரில் காண வரும் ரசிகர்களுக்காக இந்தச் சிறப்பு சலுகை அறிவிக்கப்பட்டுள்ளது. போட்டியைக் காணச் செல்லும் ரசிகர்கள் போக்குவரத்து நெரிசலின்றி மைதானத்திற்குச் சென்று வர ஏதுவாக, போட்டி நடைபெறும் நாளில் சென்னை மெட்ரோ ரயில்களில் இலவசமாகப் பயணிக்கலாம் என்று சென்னை மெட்ரோ ரயில் நிறுவனம் தெரிவித்துள்ளது.

இப்போட்டிக்கான நுழைவுத் சீட்டு (Ticket) வைத்துள்ள ரசிகர்கள், தங்களுடைய டிஜிட்டல் அல்லது அச்சு வடிவிலான (Physical) டிக்கெட்டுகளை மெட்ரோ ரயில் நிலையங்களின் தானியங்கி நுழைவு வாயில்களில் (AFC Gates) உள்ள கியூஆர் கோடு ஸ்கேனரில் ஸ்கேன் செய்து இலவசமாகப் பயணிக்கலாம். இந்த ஒரு டிக்கெட்டைக் கொண்டு ரசிகர்கள் தாங்கள் இருக்கும் இடத்திற்கு அருகிலுள்ள மெட்ரோ நிலையத்திலிருந்து மைதானத்திற்கு மிக அருகில் உள்ள ‘அரசு எஸ்டேட்’ (Government Estate) மெட்ரோ நிலையம் வரை சென்று, மீண்டும் போட்டி முடிந்த பிறகு தங்களின் இருப்பிடத்திற்குத் திரும்ப என ஒருமுறை வந்து செல்ல (Round Trip – 2 நுழைவு மற்றும் 2 வெளியேற்றம்) இலவசமாகப் பயன்படுத்திக் கொள்ளலாம்.

போட்டி முடிந்து நள்ளிரவில் ரசிகர்கள் தங்களின் வீடுகளுக்குப் பாதுகாப்பாகத் திரும்புவதற்காக, சென்னை மெட்ரோ ரயில் சேவை நள்ளிரவு 1:00 மணி வரை நீட்டிக்கப்பட்டுள்ளது. ‘அரசு எஸ்டேட்’ மெட்ரோ நிலையத்திலிருந்து விம்கோ நகர் பணிமனை மற்றும் சென்னை விமான நிலையம் நோக்கிச் செல்லும் கடைசி மெட்ரோ ரயில்கள் நள்ளிரவு 1:00 மணிக்குச் புறப்படும். இந்த நள்ளிரவு சிறப்புச் சேவையின் போது, கிரீன் லைன் பாதையில் செல்ல வேண்டிய பயணிகள் சென்ட்ரல் மெட்ரோ ரயில் நிலையத்தில் மட்டுமே ரயில்களை மாற்றிக்கொள்ள முடியும் என்றும், கடைசி ரயில் புறப்படுவதற்கு 10 நிமிடங்களுக்கு முன்பாகவே பயணிகள் நிலையத்திற்கு வர வேண்டும் என்றும் மெட்ரோ நிர்வாகம் அறிவுறுத்தியுள்ளது.