ஐடி ஊழியர்களே உஷார்… “என் பேச்சைக் கேளுங்க”… வேலை போர் அடிக்குதா?… 8 மாதமாக வேலையில்லாத இளைஞரின் ஷாக்கிங் அட்வைஸ்…!!

வேலையை ராஜினாமா செய்ய நினைக்கும் நபர்களுக்கு அறிவுரை கூறும் விதமாக, அபிஷேக் என்ற இளைஞர் வெளியிட்ட வீடியோ சமூக வலைத்தளங்களில் வைரலாகி வருகிறது. இன்ஸ்டாகிராமில் அவர் பதிவிட்டுள்ள அந்த வீடியோவில், கடந்த நான்கு ஆண்டுகளாக வேலை பார்த்து வந்த தான், ஒரு சிறிய விபத்து காரணமாக கடந்த 8 மாதங்களாக வீட்டிலேயே ஓய்வெடுக்க வேண்டிய சூழல் ஏற்பட்டதாகக் குறிப்பிட்டுள்ளார். இந்த நீண்ட கால வேலையின்மை, வேலை குறித்த தனது ஒட்டுமொத்த பார்வையையும் முற்றிலும் மாற்றிவிட்டதாக அவர் அந்தப் பதிவில் விளக்கியுள்ளார்.

தற்போதைய வேலையில் ஈடுபாடு இல்லாமல் அதனை விட்டுவிட நினைப்பவர்கள் தனது வார்த்தைகளைக் கவனமாகக் கேட்க வேண்டும் என அவர் வலியுறுத்துகிறார். வேலை செய்வதால் ஏற்படும் மன அழுத்தத்தை விட, எந்த வேலையும் இல்லாமல் வீட்டில் சும்மா இருப்பது பல மடங்கு அதிக மன உளைச்சலைக் கொடுக்கும் என்பதைத் தனது அனுபவபூர்வமாக உணர்ந்ததாகத் தெரிவித்துள்ளார். எனவே, வெறுமனே வேலைப் பளுவில் இருந்து தப்பிப்பதற்காக அவசரப்பட்டு வேலையை விட வேண்டாம் என்றும், எந்த வேலையில் இருந்தாலும் அதனைத் தொடர்ந்து செய்யுமாறும் அவர் அறிவுறுத்துகிறார்.

வேலையை விட்டுவிட்டாலே வாழ்க்கையில் நிம்மதி கிடைத்துவிடும் எனத் தவறாக நினைக்க வேண்டாம் என எச்சரிக்கும் அவர், தற்போதைய வேலையிலிருந்து தப்பிப்பதை விட வாழ்க்கையை மேம்படுத்தும் வகையிலான வேறு வேலைகளைத் தேடுவதே சிறந்தது எனக் கூறுகிறார். இந்த வீடியோ இணையத்தில் பலரது கவனத்தை ஈர்த்துள்ள நிலையில், நெட்டிசன்கள் பலரும் வேலையின்மையால் ஏற்படும் அழுத்தங்கள் குறித்தும், ஒரு வேலை என்பது வெறும் சம்பளத்தை மட்டும் தாண்டிய பல விஷயங்களைக் கொடுக்கிறது என்பது குறித்தும் தங்களது கருத்துக்களைப் பதிவிட்டு வருகின்றனர்.