ஷாக்… மத்திய அரசை துளைத்தெடுத்த அண்ணாமலை… என்ன தேர்தல் கேம் ஆடுறீங்களா?… மேகதாது விவகாரத்தில் கொந்தளித்த தமிழகம்…!

கர்நாடக அரசின் மேகதாது அணை கட்டும் முயற்சிக்கு எதிராகத் தமிழகம் கொந்தளித்து வரும் நிலையில், ‘We the Leaders’ அமைப்பின் தலைவரான அண்ணாமலை மத்திய பாஜக அரசை நோக்கிக் காரசாரமான கேள்விகளை எழுப்பியுள்ளது அரசியல் வட்டாரத்தில் பெரும் பரபரப்பை ஏற்படுத்தியுள்ளது. காவிரியின் குறுக்கே அணை கட்டத் தமிழகத்தின் அனுமதி தேவையில்லை என நாடாளுமன்றத்தில் ஜல் சக்தி துறை அமைச்சகம் தெரிவித்த கருத்தைக் கடுமையாக விமர்சித்துள்ள அவர், கடந்த 2021-இல் அணைக்கான விரிவான திட்ட அறிக்கை தயாரிக்க மற்ற மாநிலங்களின் அனுமதி கட்டாயம் எனத் தெரிவித்துவிட்டு, தற்போது மத்திய அரசு ‘யூ-டர்ன்’ அடிப்பது ஏன் எனக் கேள்வி எழுப்பியுள்ளார்.

கர்நாடகாவில் தேர்தல் ஆதாயம் தேடும் நோக்கில் மத்திய அரசு செயல்படுகிறதா என்றும், இரு மாநில சகோதரத்துவ உணர்வைக் கெடுத்து விவசாயிகளின் வாழ்வாதாரத்தோடு விளையாட வேண்டாம் என்றும் அவர் காட்டமாகப் பதிவிட்டுள்ளார். காவிரி நீர் என்பது தமிழக டெல்டா விவசாயிகளின் முதன்மை வாழ்வாதாரமாகவும் பல கோடி மக்களின் குடிநீர் ஆதாரமாகவும் விளங்குவதால், உச்ச நீதிமன்ற உத்தரவுப்படி மாதாந்திர நீர் பங்கீட்டை கர்நாடகா முறையாக வழங்க வேண்டும் என்பதில் தமிழகத்தின் அனைத்துக் கட்சிகளும் ஒரே புள்ளியில் இணைந்து நிற்கின்றன.

முன்னதாக பாஜக மாநிலத் தலைவராக இருந்தபோது அதிரடியான கருத்துகளால் கவனம் ஈர்த்த அண்ணாமலை, தற்போது தனது அணுகுமுறையில் குறிப்பிடத்தக்க மாற்றங்களைச் செய்துள்ளார். பாஜகவின் ஆசியுடன் தனிக்கட்சி தொடங்குகிறார் என்ற விமர்சனங்கள் ஒருபுறம் எழுந்தாலும், மத்திய பாஜக அரசின் நிலைப்பாட்டை எதிர்த்துத் தமிழ் மண்ணிலிருந்தும் தமிழர்களின் உரிமைகளுக்காகவும் அவர் குரல் கொடுக்கத் தொடங்கியிருப்பது பரவலான வரவேற்பைப் பெற்று வருகிறது.