தவெக அமைச்சரின் ரகசிய வெளிநாட்டுப் பயணம்… இன்ஸ்டாகிராம் ரீல்ஸை பார்த்து மேயர் பிரியா போட்ட குண்டு…. அரசியலில் அடுத்த பரபரப்பு.!

தமிழ்நாட்டில் தமிழக வெற்றிக் கழகம் (தவெக) ஆட்சி அமைந்த பிறகு, அரசியல் களம் நாளுக்கு நாள் பரபரப்பாகி வருகிறது. இந்நிலையில், தவெக அரசின் தொழில்துறை அமைச்சர் கீர்த்தனாவின் தென் கொரியா பயணம் குறித்து சென்னை மேயர் பிரியா முன்வைத்துள்ள விமர்சனங்கள் தற்போதைய அரசியல் வட்டாரத்தில் பெரும் புயலைக் கிளப்பியுள்ளன. அமைச்சர் அதிகாரப்பூர்வ அறிவிப்புகள் ஏதுமின்றி வெளிநாடு சென்றுள்ளதையும், சமூக ஊடகங்களில் அவர் பதிவிடும் ரீல்ஸ்கள் மூலமாகவே அவரது பயணம் மக்களுக்குத் தெரிய வருவதையும் மேயர் பிரியா மிகக் கடுமையாகக் கிண்டல் செய்துள்ளார்.

பொதுவாக ஒரு மாநிலத்தின் அமைச்சர் தொழில் முதலீடுகளை ஈர்ப்பதற்காக வெளிநாடு பயணம் மேற்கொள்கிறார் என்றால், அதற்கான திட்டங்கள் முன்கூட்டியே வகுக்கப்பட்டு, செய்தியாளர் சந்திப்பு வாயிலாக மக்களுக்குத் தெளிவுபடுத்தப்படும் என்று மேயர் பிரியா சுட்டிக்காட்டியுள்ளார். தவெக அரசு வெளிப்படையான நிர்வாகத்தைத் தருவோம் என்று கூறிவிட்டு, அமைச்சரின் பயண விவரங்களை ரகசியமாக வைத்திருப்பது ஏன் என்ற கேள்வியையும் அவர் எழுப்பியுள்ளார். கடந்த திமுக ஆட்சியில் முதல்வர் மு.க.ஸ்டாலின் வெளிநாடு செல்லும்போது புள்ளி விவரங்களுடன் செய்தியாளர்களைச் சந்தித்ததை நினைவுகூர்ந்த அவர், இதுதான் உண்மையான வெளிப்படைத்தன்மை என்றும், தவெக அரசு மக்களின் கேள்விகளுக்குப் பதில் சொல்லியே தீர வேண்டும் என்றும் வலியுறுத்தியுள்ளார்.

அமைச்சர் கீர்த்தனா தென் கொரியாவில் ஹூண்டாய் ஹெவி இண்டஸ்ட்ரீஸ் அதிகாரிகளைச் சந்தித்து, தூத்துக்குடியில் கப்பல் கட்டும் தளம் அமைப்பது குறித்து ஆலோசித்ததாகக் கூறப்படும் நிலையில், அவர் அங்கு டான்ஸ் ஆடுவதிலும், ரீல்ஸ் போடுவதிலுமே குறியாக இருக்கிறார் என மேயர் பிரியா சாடியுள்ளார். மேலும், தமிழ்நாட்டில் தவெக ஆட்சிக்கு வந்த பிறகு எத்தனை தொழில் முதலீடுகள் மாநிலத்தை விட்டு வெளியேறியுள்ளன என்பதைப் பட்டியலிட்ட மேயர், தொழில்துறையைக் கவனிப்பதை விட்டுவிட்டு அமைச்சர் பொழுதுபோக்கில் ஈடுபட்டு வருவதாகக் குற்றம்சாட்டியுள்ளார்.

அடுத்தபடியாக, மின்சாரத் தடை மற்றும் உள்ளாட்சிப் பிரச்சினைகளுக்காகத் தொடர்ந்து திமுக மீது தவெகவினர் குற்றம்சுமத்தி வருவதற்கும் மேயர் பிரியா முற்றுப்புள்ளி வைத்துள்ளார். மின்சாரத் துறைக்கும் மாநகராட்சிக்கும் எந்தவித சம்பந்தமும் இல்லை என்கிற அடிப்படைக் கூட தெரியாமல் தவெகவினர் பேசுவதாக அவர் சாடியுள்ளார். சென்னை மாநகராட்சி, குடிநீர் வாரியம் ஆகியவை தனித்தனித் துறைகள் என்பது அமைச்சருக்கு நன்றாகத் தெரிந்திருந்தும், உள்ளாட்சி அமைப்புகளில் திமுகவினர் இருக்கிறார்கள் என்ற ஒரே காரணத்திற்காக எல்லாவற்றிற்கும் மாநகராட்சியைக் குற்றம்சாட்டுவது எந்த வகையில் நியாயம் என்று கேள்வி எழுப்பி தன் கண்டனத்தைப் பதிவு செய்துள்ளார்.