அதிமுக ஆட்சிக் காலத்தில் செல்வாக்குமிக்க அமைச்சராகத் திகழ்ந்த எஸ்.பி. வேலுமணி, தற்போதைய எடப்பாடி பழனிசாமி தலைமையிலான கட்சியில் மிக முக்கியமான ‘பவர் சென்டராக’ விளங்குகிறார். குறிப்பாக, கோவை உள்ளிட்ட மேற்கு மாவட்டங்களில் அதிமுகவின் பலமாகத் திகழும் இவரை அரசியல் ரீதியாகக் கட்டுப்படுத்த திமுக தலைமை திட்டமிட்டுள்ளது. இதன் ஒரு பகுதியாக, கடந்த அதிமுக ஆட்சியில் அவர் வகித்த உள்ளாட்சித் துறையில் நடைபெற்றதாகக் கூறப்படும் பழைய முறைகேடு புகார்களைத் தற்போது முதலமைச்சர் ஸ்டாலின் தலைமையிலான அரசு மீண்டும் கையில் எடுத்துள்ளது.
முக்கியமாக, ஸ்மார்ட் சிட்டி திட்டத்தில் நடந்த முறைகேடுகள் மற்றும் தமிழகம் முழுவதும் தெருவிளக்குகள் (LED Bulbs) மாற்றப்பட்டதில் பல கோடி ரூபாய் ஊழல் நடந்ததாக எழுந்த புகார்கள் தற்போது தீவிரமாகத் தூசி தட்டப்படுகின்றன. இதில் சுமார் 500 கோடி ரூபாய் வரை முறைகேடு நடந்துள்ளதாக லஞ்ச ஒழிப்புத்துறை ஏற்கனவே வழக்குப்பதிவு செய்திருந்தது. இப்போது இந்த வழக்குகளில் கூடுதல் ஆதாரங்களைத் திரட்டி, வேலுமணிக்கு சட்ட ரீதியான நெருக்கடிகளை அதிகரிக்க திமுக அரசு ‘பக்கா ஸ்கெட்ச்’ போட்டுள்ளதாக அரசியல் வட்டாரங்கள் தெரிவிக்கின்றன.
வேலுமணிக்கு நெருக்கமானவராகக் கருதப்பட்ட ஒப்பந்ததாரர் சந்திரசேகர், ஒரு கட்டத்தில் அவரிடமிருந்து விலகிச் சென்றார். அவரை அரசுத் தரப்பு சாட்சியாக (Approver) மாற்றி வேலுமணியின் அரசியல் வாழ்வுக்கு முற்றுப்புள்ளி வைக்க திமுக முயன்றது. ஆனால், தற்போது சந்திரசேகர் மீண்டும் வேலுமணியுடன் கைகோர்த்துள்ளது அதிமுக தரப்பில் நம்பிக்கையை ஏற்படுத்தினாலும், அரசுத் தரப்பு பழைய கோப்புகளைத் தோண்டி எடுப்பது வேலுமணிக்கு கடும் மன உளைச்சலையும் பதற்றத்தையும் ஏற்படுத்தியுள்ளதாகக் கூறப்படுகிறது.
கோவை மண்டலத்தில் திமுகவிற்கு சவாலாக இருக்கும் வேலுமணியின் தேர்தல் வியூகங்களை முறியடிக்க, இந்த ஊழல் வழக்குகளே சரியான ஆயுதம் என திமுக கருதுகிறது. வரவிருக்கும் தேர்தல் களத்தில் இத்தகைய சட்டப் போராட்டங்கள் வேலுமணியை முடக்கி வைக்கும் பட்சத்தில், அது மேற்கு மாவட்டங்களில் திமுகவின் வெற்றியை எளிதாக்கும் என ஆளுங்கட்சி கணக்கு போடுகிறது. இதனால் தமிழக அரசியலில் எஸ்.பி. வேலுமணியைச் சுற்றியுள்ள விவகாரங்கள் பெரும் பரபரப்பை ஏற்படுத்தியுள்ளன.