தலைமை சொன்ன ஒத்த வார்த்தைக்காக பொறுமையா இருக்கேன்.. இல்லனா நடக்கறதே வேற… வைகோவுக்கு பதிலடி கொடுத்த மாணிக்கம் தாகூர் ..!!

மதிமுக பொதுச்செயலாளர் வைகோ, காங்கிரஸாரைப் பற்றி விமர்சித்த கருத்திற்கு, விருதுநகர் நாடாளுமன்ற உறுப்பினர் மாணிக்கம் தாகூர் தற்போது பதிலடி கொடுத்துள்ளார். சமீபத்தில் வைகோ பேசும்போது, காங்கிரஸாரின் “கதர் சட்டைகள் கிழிக்கப்பட்டிருப்பதாக” குறிப்பிட்டிருந்தார். இந்த காட்டமான விமர்சனம் அரசியல் வட்டாரத்தில் பெரும் விவாதத்தை ஏற்படுத்திய நிலையில், மாணிக்கம் தாகூர் தனது எக்ஸ் (X) தளத்தில் இதற்கு விளக்கம் அளித்துள்ளார்.

தன்னைப் பற்றிய கேள்விகளுக்கும், வைகோவின் விமர்சனத்திற்கும் பதிலளித்த மாணிக்கம் தாகூர், தான் அமைதி காப்பதன் காரணத்தை விளக்கியுள்ளார். “கூட்டணி குறித்துப் பேசக்கூடாது என்று அகில இந்திய காங்கிரஸ் தலைமை சொன்ன ஒரு வார்த்தைக்கு மரியாதை கொடுத்து, இதைப் பொறுமையுடன் கடந்து போகிறேன்; பயந்து அல்ல அண்ணன் வைகோ” என அவர் பதிவிட்டுள்ளார். இதன் மூலம் வைகோவின் கருத்திற்குத் தனது எதிர்ப்பை அவர் நாசூக்காகப் பதிவு செய்துள்ளார்.

இந்த மோதல் போக்கு திமுக தலைமையிலான கூட்டணியில் பெரும் சலசலப்பை ஏற்படுத்தியுள்ளது. தேர்தல் நெருங்கும் வேளையில் கூட்டணிக் கட்சிகளுக்கு இடையே நிலவும் இத்தகைய வார்த்தைப் போர், கூட்டணியின் ஒற்றுமையைப் பாதிக்குமோ என்ற கேள்வி எழுந்துள்ளது. காங்கிரஸ் தலைமை தலையிட்டு இந்த விவகாரத்தைச் சுமூகமாக முடிக்கும் என்று எதிர்பார்க்கப்படும் வேளையில், இந்த விவகாரம் தமிழக அரசியலில் பேசுபொருளாக மாறியுள்ளது.