“விஜய்யுடன் கைகோர்க்கிறதா காங்கிரஸ்?”… திமுகவை அதிரவைத்த மாணிக்கம் தாகூரின் ஒற்றை ட்வீட்…!

தமிழக சட்டமன்றத் தேர்தல் முடிவுகள் தற்போதைய அரசியல் களத்தை அதிரவைத்திருக்கும் நிலையில், தமிழக வெற்றிக் கழகம் (தவெக) தனிப்பெரும் கட்சியாக உருவெடுத்துள்ளது. இருப்பினும், ஆட்சியமைக்கத் தேவையான 118 என்ற மேஜிக் எண்ணை எட்ட முடியாமல் 107 தொகுதிகளில் (விஜய் இரண்டு தொகுதிகளில் வென்றதை கணக்கில் கொண்டு) தவெக முட்டி மோதி வருகிறது. இந்த இக்கட்டான சூழலில், தவெக ஆட்சி அமைக்க இன்னும் 11 எம்எல்ஏக்களின் ஆதரவு தேவைப்படுவதால், கூட்டணிக் கட்சிகளின் பக்கம் விஜய் கவனம் செலுத்தி வருகிறார். குறிப்பாக, காங்கிரஸ் கட்சியின் ஆதரவைப் பெற திரைமறைவு பேச்சுவார்த்தைகள் தீவிரமாக நடந்து வருகின்றன.

இந்த அரசியல் குழப்பங்களுக்கு இடையே, காங்கிரஸ் எம்பி மாணிக்கம் தாகூர் தனது எக்ஸ் பக்கத்தில் பதிவிட்ட “வெற்றி நிச்சயம்! தோற்றாலும் தோல்வியில்லை!” என்ற பாரதியாரின் கவிதை வரிகள் திமுகவினரை கடும் அதிருப்தியில் ஆழ்த்தியுள்ளது. ஏற்கனவே ஆட்சி அதிகாரத்தில் பங்கு வேண்டும் என்ற கோரிக்கையை திமுக நிராகரித்ததால் அதிருப்தியில் இருந்த காங்கிரஸ், தற்போது தவெக-வுடன் கைகோர்க்கும் சமிக்ஞைகளை வெளிப்படுத்தி வருகிறது. இதுகுறித்து முடிவெடுக்க அகில இந்திய காங்கிரஸ் கமிட்டி தமிழக மாநிலத் தலைக்கே அதிகாரம் வழங்கியுள்ளதால், காங்கிரஸின் அடுத்த கட்ட நடவடிக்கை மிகுந்த எதிர்பார்ப்பை ஏற்படுத்தியுள்ளது.

காங்கிரஸ் வசம் உள்ள 5 எம்எல்ஏக்களின் ஆதரவு தவெக-வுக்கு மிக முக்கியமானதாகப் பார்க்கப்படுகிறது. “கூட்டணி என்பது தேர்தலுக்காக உருவாக்கப்பட்டதுதான்” என்று மாணிக்கம் தாகூர் வெளிப்படையாகக் கூறியிருப்பது, திமுகவுடனான உறவை முறித்துக்கொள்ள காங்கிரஸ் தயாராகிவிட்டதையே காட்டுகிறது. மதவாத சக்திகளைத் தமிழக மக்கள் ஏற்கவில்லை என்பதைச் சுட்டிக்காட்டிய அவர், தேர்தல் முடிவுகளுக்குப் பிறகு புதிய அரசியல் கணக்குகளுக்கு வழிவகுத்துள்ளார். இதனால், திமுக தலைமையிலான கூட்டணியில் விரிசல் விழுவது ஏறக்குறைய உறுதியாகிவிட்டதாக அரசியல் விமர்சகர்கள் கருதுகின்றனர்.

ஒருவேளை காங்கிரஸ் தவெக-வுக்கு ஆதரவு அளிக்கும் பட்சத்தில், நீண்ட காலமாகக் கோரப்பட்டு வரும் “ஆட்சியில் பங்கு” என்ற கோரிக்கை நிறைவேற வாய்ப்புள்ளது. திமுக ஆட்சியில் அமைச்சர் பதவி கிடைக்காத நிலையில், விஜய்யுடன் இணைவதன் மூலம் அதிகாரத்தைக் கைப்பற்ற காங்கிரஸ் திட்டமிடுகிறது. இதனால் கோபமடைந்த திமுகவினர் சமூக வலைதளங்களில் காங்கிரஸைக் கடுமையாக விமர்சித்து வருகின்றனர். இன்னும் சற்று நேரத்தில் வெளியாகவுள்ள காங்கிரஸின் அதிகாரப்பூர்வ முடிவு, தமிழக அரசியலில் ஒரு புதிய அத்தியாயத்தைத் தொடங்குமா அல்லது தற்போதைய குழப்பத்தை நீடிக்குமா என்பது தெரிந்துவிடும்.