தமிழக காங்கிரஸ் கமிட்டி தலைவர் மாணிக்கம் தாகூர், திமுகவின் தேர்தல் தோல்வி மற்றும் எஸ்.ஐ.ஆர் (S.I.R – சிறப்பு வாக்காளர் திருத்தப் பணிகள்) விவகாரம் குறித்து வெளியிட்டுள்ள அறிக்கை தமிழக அரசியலில் பெரும் விவாதத்தை ஏற்படுத்தியுள்ளது. கடந்த சட்டமன்றத் தேர்தலில் திமுக சந்தித்த பின்னடைவுக்கு, வாக்காளர் பட்டியல் திருத்தப் பணிகள் காரணமல்ல என்று அவர் திட்டவட்டமாகத் தெரிவித்துள்ளார்.
தேர்தலுக்கு முன்பு பேசிய அப்போதைய முதலமைச்சர் மு.க. ஸ்டாலின், தமிழகத்தில் வாக்காளர் பட்டியல் திருத்தப் பணிகள் வெற்றிகரமாக முடிக்கப்பட்டுவிட்டதாகவும், திமுகவின் 7 லட்சம் பேர் கொண்ட பூத் கமிட்டி முகவர்கள் வாக்குகளைப் பாதுகாப்பார்கள் என்றும் பெருமிதத்துடன் குறிப்பிட்டதை மாணிக்கம் தாகூர் தனது அறிக்கையில் சுட்டிக்காட்டியுள்ளார். அவ்வாறு இருக்க, தேர்தல் முடிவுகள் எதிராக வந்தவுடன் எஸ்.ஐ.ஆர் மீது பழியைப் போடுவது எந்த வகையான அரசியல் என்று அவர் கேள்வி எழுப்பியுள்ளார்.
மேற்கு வங்கம், அசாம், பீகார், மகாராஷ்டிரா போன்ற மாநிலங்களில் எஸ்.ஐ.ஆர் மூலம் முறைகேடுகள் நடைபெற்ற போதிலும், தமிழ்நாடு, கேரளம் மற்றும் புதுச்சேரியில் அதுதொடர்பாக எந்தப் புகாரும் எழவில்லை என்பதை அவர் சுட்டிக்காட்டியுள்ளார். மாறாக, வரலாறு காணாத ஊழல், சட்டம் ஒழுங்கு சீரழிவு, பெண்களுக்கு எதிரான தவறான பேச்சுகள் மற்றும் கூட்டணிக் கட்சிகளை நடத்திய விதம் ஆகியவையே திமுகவின் உண்மையான தோல்விக்குக் காரணம் என அவர் குற்றம் சாட்டியுள்ளார்.
மேலும், எஸ்.ஐ.ஆர் விவகாரத்தில் திமுக இரட்டை வேடம் போடுவதாகவும் அவர் விமர்சித்துள்ளார். டெல்லியில் தலைமைத் தேர்தல் ஆணையர் பதவி விலகக் கோரி நடைபெற்ற போராட்டத்தில் இடதுசாரிகள், விசிக, மதிமுக உள்ளிட்ட கூட்டணிக் கட்சிகளின் தலைவர்கள் பங்கேற்று கைதான போதிலும், திமுக தரப்பில் இருந்து ஒரு நாடாளுமன்ற உறுப்பினர் கூட கலந்துகொள்ளவில்லை என்று அவர் குற்றம் சாட்டியுள்ளார்.
பாஜகவை பகைத்துக்கொள்ள நேரிடும் என்ற அச்சத்தால்தான் திமுக எம்பிக்கள் இந்தப் போராட்டத்தில் பங்கேற்கவில்லை என்றும், தமிழ்நாட்டின் நலன் மற்றும் ஜனநாயகத்தின் மீது அக்கறை இருந்தால் திமுக இதில் தனது நிலைப்பாட்டை மாற்றிக்கொள்ள வேண்டும் என்றும் அவர் வலியுறுத்தியுள்ளார். வாக்காளர்கள் நீக்கப்படுவதைத் தடுத்துவிட்டதாகத் தம்பட்டம் அடித்துவிட்டு, தோல்விக்குப் பிறகு அதனை ஒரு காரணமாகக் கூறுவதை மக்கள் ஏற்றுக்கொள்ள மாட்டார்கள் என்றும் அவர் எச்சரித்துள்ளார்.
இந்த அறிக்கை திமுக – காங்கிரஸ் கூட்டணிக்குள் நிலவும் ச சலசலப்புகளை வெளிச்சம் போட்டுக் காட்டியுள்ளதோடு, எதிர்க்கட்சிகளுக்கும் விவாதப் பொருளாக மாறியுள்ளது. தேர்தல் தோல்விக்கான காரணங்கள் குறித்த இந்தக் கடுமையான விமர்சனம் தற்போதைய அரசியல் களத்தில் பெரும் பரபரப்பை ஏற்படுத்தியுள்ளது.