உத்தரபிரதேச மாநிலம் இட்டாக் மாவட்டம் அம்ரோலி கிராமத்தில் ஒரு நபர் சுட்டுக்கொல்லப்பட்ட சம்பவம் தொடர்பாகப் போலீசார் விசாரணை நடத்தி வருகின்றனர். அனீஷ் என்பவரின் மனைவிக்கும் அதே கிராமத்தைச் சேர்ந்த கிஷோர் என்ற இளைஞருக்கும் இடையே தொடர்பு இருந்து வந்ததாகக் கூறப்படுகிறது. இவர்கள் இருவரும் அனீஷுக்குத் தெரியாமல் அவ்வப்போது சந்தித்து வந்துள்ளனர்.
கடந்த ஜூன் 18-ம் தேதி இரவு அனீஷ் வீட்டில் இல்லாத நேரத்தில் கிஷோர் அங்கு சென்றுள்ளார். கிஷோர் வீட்டை விட்டு வெளியேற முயன்றபோது அனீஷ் வீட்டிற்கு வந்துள்ளார். கிஷோரைக் கண்டதும் அனீஷ் அவரிடம் வாக்குவாதத்தில் ஈடுபட்டுள்ளார்.
இந்த வாக்குவாதத்தின் போது ஆத்திரமடைந்த கிஷோர், தான் வைத்திருந்த துப்பாக்கியால் அனீஷைச் சுட்டதாகக் கூறப்படுகிறது. இதில் பலத்த காயமடைந்த அனீஷ் சம்பவ இடத்திலேயே உயிரிழந்தார். இதுகுறித்து தகவலறிந்த போலீசார் கிஷோரைக் கைது செய்து சிறையில் அடைத்தனர். இந்தச் சம்பவம் குறித்து போலீசார் தொடர்ந்து விசாரணை மேற்கொண்டு வருகின்றனர்.