சமூக வலைதளங்களில் தினமும் பல வினோதமான கண்டுபிடிப்புகள் மற்றும் ‘ஜுகாட்’ (Jugaad) எனப்படும் தற்காலிக ஏற்பாடுகள் வைரலாவது வழக்கம். அந்த வகையில், தற்போது ஸ்கூட்டி ஒன்றின் சீட்டில் ஒரு நபர் செய்துள்ள வினோதமான மாற்றம் இணையத்தில் பேசுபொருளாகியுள்ளது. தனது மொபைல் போனை வைப்பதற்காக, அவர் ஸ்கூட்டியின் சீட்டில் ஒரு சிறிய பகுதியை வெட்டி எடுத்திருப்பது பலரையும் வியப்பிலும், அதே சமயம் அதிர்ச்சியிலும் ஆழ்த்தியுள்ளது.
அந்த வைரல் வீடியோவில், ஸ்கூட்டியின் சீட்டில் சரியாக மொபைல் போன் அமரும் அளவிற்கு ஒரு செவ்வக வடிவப் பள்ளம் செதுக்கப்பட்டுள்ளது. வாகனம் ஓட்டும் போது அல்லது சும்மா உட்கார்ந்திருக்கும் போது, மொபைலைத் தேட வேண்டிய அவசியம் இல்லாமல், நேராக அந்தப் பள்ளத்தில் மொபைலைச் சொருகி வைத்துக் கொள்ளும் வசதியை அந்த நபர் ஏற்படுத்தியுள்ளார். முதல் பார்வையில் இது ஒரு புத்திசாலித்தனமான ஐடியாவாகத் தோன்றினாலும், சீட்டை இப்படிச் சேதப்படுத்தியது பலருக்கு அதிருப்தியை ஏற்படுத்தியுள்ளது.
Person who invented this should get 10000 topon ki salami 🫡 pic.twitter.com/yJgzNNZmZr
— Aparajite (@amshilparaghu) April 16, 2026
இந்த வீடியோவை பார்த்த இணையவாசிகள் தங்களது கருத்துகளைப் பகிர்ந்து வருகின்றனர். “ஐடியா நன்றாக இருந்தாலும், விலை உயர்ந்த வண்டியின் சீட்டை இப்படிச் சிதைக்க வேண்டுமா?” என்றும், “மழையில் வண்டி நனைந்தால் அந்தப் பள்ளத்தில் நீர் தேங்கி சீட்டே பாழாகிவிடும்” என்றும் பலர் எச்சரித்து வருகின்றனர். மேலும், வண்டி ஓட்டும்போது கவனத்தைச் சிதறடிக்கும் இத்தகைய முயற்சிகள் விபத்துக்கே வழிவகுக்கும் எனப் பலரும் கோபத்தை வெளிப்படுத்தியுள்ளனர்.