கர்நாடக மாநிலம் ஹப்பள்ளி-தார்வாத் காவல் ஆணையரக எல்லைக்குட்பட்ட ஓல்டு ஹப்பள்ளி காவல் நிலையத்தில், 14 வயது சிறுமி ஒருவருக்கு நேர்ந்த பாலியல் வன்கொடுமை தொடர்பான போக்சோ வழக்கு விசாரணை தீவிரமாக நடைபெற்று வந்தது. இந்த வழக்கின் தொடர் விசாரணையின் போது, அதே பகுதியைச் சேர்ந்த 15 வயது மதிக்கத்தக்க மற்றொரு சிறுமி தற்பொழுது மீண்டும் கர்ப்பமடைந்துள்ள திடுக்கிடும் உண்மை வெளிச்சத்திற்கு வந்து அதிகாரிகளை அதிர்ச்சியடைய வைத்துள்ளது.
இந்த இரு சிறுமிகளும் நெருங்கிய சொந்தக்காரர்கள் என்பதும், இரண்டு உடன்பிறந்த சகோதரிகளின் மகள்கள் என்பதும் விசாரணையில் தெரியவந்துள்ளது. ஒரே குடும்பப் பின்னணியைக் கொண்ட இந்த இரு சிறுமிகளையும் ஒரே நபர் குறிவைத்துச் சீரழித்திருப்பது தற்பொழுது பூதாகரமாக வெடித்துள்ளது. கடந்த 2025 ஆம் ஆண்டில், பாதிக்கப்பட்ட 15 வயது சிறுமியை அதே குற்றவாளி கட்டாயப்படுத்தி இரயில் நிலையத்தின் அருகே உள்ள ஒரு பாழடைந்த பகுதிக்குக் கூட்டிச் சென்று முதல்முறையாகப் பாலியல் வன்கொடுமை செய்துள்ளார்.
அதன் விளைவாக அந்தச் சிறுமிக்கு ஒரு குழந்தை பிறந்த நிலையில், அதனை யாருக்கும் தெரியாமல் அடையாளம் தெரியாத நபர் ஒருவரிடம் பெற்றோர் ஒப்படைத்துள்ளனர். இந்நிலையில், கடந்த மே மாதத்தில் அதே நபர் அச்சிறுமியை மீண்டும் கொடூரமாகப் பாலியல் ரீதியாகத் துன்புறுத்தியதால் அவர் இரண்டாவது முறையாகக் கர்ப்பமடைந்துள்ளார். இந்த இரு போக்சோ விவகாரங்கள் குறித்தும் காவல் ஆணையர் என். ஷஷி குமார் தலைமையில் தனிப்படையினர் தீவிரமாக விசாரித்து வருவதுடன், இதில் தொடர்புடைய குடும்ப உறுப்பினர்கள் அனைவருக்கும் சட்டப்பூர்வ நோட்டீஸ் அனுப்பி அடுத்தகட்ட அதிரடி நடவடிக்கைகளை மேற்கொண்டு வருகின்றனர்.