மும்பை உள்ளூர் ரயிலில் பெண் ஒருவர் சக ஆண் பயணியால் கொடூரமாகத் தாக்கப்பட்ட சம்பவம் தொடர்பான காணொளி சமூக வலைதளங்களில் வெளியாகி பெரும் அதிர்ச்சியை ஏற்படுத்தியுள்ளது. வடாலா ரயில் நிலையத்திற்கு அருகே நடந்ததாகக் கூறப்படும் இச்சம்பவத்தின் போது, அந்தப் பெண்ணுடன் காரசார விவாதத்தில் ஈடுபட்ட நபர், திடீரெனத் தனது இடுப்பு வாரைக் (Belt) கழற்றி அவரைத் தாக்கி மிரட்டல் விடுத்துள்ளார். ஓடும் ரயிலில் இந்தத் தாக்குதல் நடந்தபோதும், அங்கிருந்த பிற பயணிகள் எவ்விதத் தலையீடும் செய்யாமல் அமைதியாக வேடிக்கை பார்த்தது காணொளியில் தெளிவாகத் தெரிகிறது.
இந்தச் சம்பவம் குறித்து இணையத்தில் கடுமையான எதிர்ப்புகளும் கண்டனங்களும் எழுந்துள்ளன. பெண் ஒருவர் ஆபத்தில் இருக்கும்போது சக பயணிகள் அவருக்கு உதவ முன்வராதது ஏன் என்று பலரும் கேள்வி எழுப்பி வருகின்றனர். இது தொடர்பாக ரயில்வே காவல்துறையோ அல்லது ரயில்வே நிர்வாகமோ இதுவரை எந்தவொரு அதிகாரப்பூர்வ விளக்கத்தையும் வெளியிடவில்லை. மேலும், இச்சம்பவம் குறித்துப் புகார் அளிக்கப்பட்டுள்ளதா அல்லது தாக்குதலில் ஈடுபட்ட நபர் மீது நடவடிக்கை எடுக்கப்பட்டுள்ளதா என்பது குறித்தும் தெளிவான தகவல்கள் வெளியாகவில்லை.
மும்பை உள்ளூர் ரயில்களில் பெண்களின் பாதுகாப்பு மற்றும் பயணிகளின் அவசரக்கால உதவிகள் தொடர்பான விழிப்புணர்வு மீண்டும் பேசுபொருளாக மாறியுள்ளது. பயணிகளின் பாதுகாப்பை உறுதி செய்ய ரயில்வே காவல் துறையினர் ரோந்துப் பணிகளைத் தீவிரப்படுத்த வேண்டும் என்றும், ஓடும் ரயில்களில் நடைபெறும் குற்றச் செயல்களைத் தடுக்க உடனடி நடவடிக்கை எடுக்கப்பட வேண்டும் என்றும் பொதுமக்கள் வலியுறுத்தி வருகின்றனர்.