கலைஞருக்குப் பின் திமுகவை ஆள துடித்தாரா வைகோ… வைகோ மீது மல்லை சத்யா வைத்த பரபரப்பு குற்றச்சாட்டு…!

மதிமுகவின் முன்னாள் நிர்வாகி மல்லை சத்யா அண்மையில் ஊடக நேர்காணல் ஒன்றில், அக்கட்சியின் பொதுச்செயலாளர் வைகோ குறித்தும், அவரது அரசியல் நகர்வுகளின் பின்னணி குறித்தும் அதிரடியான பல தகவல்களைப் பகிர்ந்துள்ளார். வைகோவின் அதிகார ஆசை, திமுக மீதான அவரது நீண்ட கால வன்மம், மற்றும் உட்கட்சி ஜனநாயகப் படுகொலை ஆகியவற்றை மல்லை சத்யா மிகக் கடுமையாக விமர்சித்துள்ளார். வைகோ எப்போதும் திமுகவின் தலைமைப் பொறுப்பைக் கைப்பற்றவே துடித்தார் என்ற உண்மையை இந்த நேர்காணல் வெளிச்சம்போட்டுக் காட்டியுள்ளது.

தொடக்கக் காலத்தில் வைகோ திமுகவின் தலைமையை தன்வசப்படுத்தவே தீவிரமாக முயன்றார் என்று மல்லை சத்யா குறிப்பிட்டுள்ளார். கலைஞருக்குப் பிறகு நாம் தலைவராக வரலாம் என்று எதிர்பார்த்த வைகோவிடம், மூத்த தலைவர்கள் பொறுமையைக் கடைப்பிடிக்குமாறு அறிவுறுத்தியுள்ளனர். அதற்கு வைகோ, “இன்னும் எத்தனை நாளைக்கு காத்துட்டு இருப்பது, அவர் ஒன்னும் போவது மாதிரி தெரியல” என்று கலைஞரைக் குறித்து சலிப்புடன் பேசியதாக சத்யா உடைத்துக் கூறியுள்ளார். அந்தப் பேராசை நிறைவேறாத சூழலில்தான், திமுகவை ஒழித்துக்கட்டும் நோக்கோடு அவர் மதிமுகவைத் தொடங்கினார் என்று அவர் சுட்டிக்காட்டியுள்ளார்.

திமுகவுக்கு எதிராக வைகோ பல வியூகங்களை வகுத்த போதிலும், 1996 தேர்தலிலேயே அவரை வீழ்த்தி திமுக ஆட்சிப் பீடத்தில் அமர்ந்தது. அதன் பின்னர் தனித்துப் போட்டியிட்ட தேர்தல்களில் மதிமுக தொடர் தோல்விகளைச் சந்தித்தது. கொள்கைப் பற்றுள்ள மதிமுக தொண்டர்கள் மாற்று அரசியல் தேடி அதிமுகவிற்கோ, பாஜகவிற்கோ செல்ல விரும்பாமல், மீண்டும் தாய் கழகமான திமுகவிற்கே செல்ல விரும்புவார்கள் என்ற உளவியலை வைகோ நன்கு அறிந்திருந்தார். இதனால் தொண்டர்கள் திமுகவிற்குச் செல்வதைத் தடுக்கவே, அவர் தொடர்ந்து திமுக கூட்டணியை விட்டு விலகாமல் ஒட்டிக்கொண்டிருந்தார் என்று மல்லை சத்யா விமர்சித்துள்ளார்.

இதற்கு உதாரணமாக 2021 சட்டமன்றத் தேர்தலை மல்லை சத்யா சுட்டிக்காட்டியுள்ளார். அத்தேர்தலில் மதிமுகவின் 6 பேர் உதயசூரியன் சின்னத்தில் போட்டியிடுவதற்காக, வைகோ தங்களை அறிவாலயத்திற்கு அழைத்துச் சென்று திமுக தலைவர் ஸ்டாலினிடம் ஒப்படைத்துவிட்டு “வாடகைக்கு விட்டுச் சென்றதாக” சாடியுள்ளார். மேலும், வாரிசு அரசியலை எதிர்த்து மதிமுகவைத் தொடங்கிய வைகோ, இன்று தனது கொள்கையைத் தானே உடைத்துக்கொண்டு, தனது மகன் துரை வைகோவை அரசியலுக்குக் கொண்டு வந்திருப்பதையும் அவர் கடுமையாகச் சாடியுள்ளார். மு.க.ஸ்டாலின் சிறு வயது முதலே கட்சிக்காக உழைத்து இந்த இடத்திற்கு வந்துள்ளார், ஆனால் துரை வைகோ 50 வயது வரை சொத்துக்களைச் சேர்த்துவிட்டு திடீரென அரசியலுக்கு வந்துள்ளார் என்று ஒப்பிட்டுக் காட்டியுள்ளார்.

இறுதியாக, மதிமுகவில் அறிவிக்கப்படாத உட்கட்சி ஜனநாயகப் படுகொலை நிகழ்ந்ததாக மல்லை சத்யா குற்றம் சாட்டியுள்ளார். துரை வைகோவின் அரசியல் வருகைக்கான வாக்கெடுப்பு கடைசி நிமிடம் வரை தங்களுக்குத் தெரியாமல் இரகசியமாக நடத்தப்பட்டது என்று கூறியுள்ளார். வைகோவின் இந்த சந்தர்ப்பவாதப் போக்கைப் புரிந்துகொண்டே அக்கட்சியின் மூத்த முன்னோடிகள் பலர் விலகினர். அவ்வாறு விலகி திமுகவில் இணைய முயன்ற அதிருப்தியாளர்களைக் கூட, வைகோ கூட்டணிக் காரணங்களைக் காட்டி திமுக தலைமைக்கு அழுத்தம் கொடுத்து தடுத்து நிறுத்தினார் என்று மல்லை சத்யா தனது நேர்காணலில் போட்டு உடைத்துள்ளார்.