மத்திய அரசின் பொதுத்துறை நிறுவனமான கோல் இந்தியா லிமிடெட்டின் துணை நிறுவனமான தென்கிழக்கு நிலக்கரி வயல்கள் நிறுவனத்தில் (SECL) காலியாக உள்ள 1,055 பணியிடங்களுக்கான வேலைவாய்ப்பு அறிவிப்பு வெளியாகியுள்ளது. இதில் மைனிங் சித்தார் (577 இடங்கள்), உதவி ஃபோர்மேன் (435 இடங்கள்) மற்றும் துணை சர்வேயர் (43 இடங்கள்) ஆகிய பதவிகள் நிரப்பப்பட உள்ளன. இப்பணிகளுக்குத் தேர்வு செய்யப்படுபவர்களுக்கு மாதம் ரூ.47,330 வரை ஊதியம் வழங்கப்படும் என அறிவிக்கப்பட்டுள்ளது.
இப்பணிகளுக்கு விண்ணப்பிக்க விரும்புவோர் பத்தாம் வகுப்பு தேர்ச்சியுடன், சம்பந்தப்பட்ட துறைகளில் (மைனிங், எலக்ட்ரிக்கல், மைன் சர்வேயிங்) ஐடிஐ அல்லது டிப்ளமோ முடித்திருக்க வேண்டும். மேலும், அந்தந்தப் பணிகளுக்குத் தேவையான சட்டப்பூர்வமான சான்றிதழ்களை (Certificate of Competency) பெற்றிருப்பது அவசியமாகும். விண்ணப்பதாரர்கள் 18 முதல் 30 வயதிற்கு உட்பட்டவர்களாக இருக்க வேண்டும்; இருப்பினும் அரசு விதிகளின்படி குறிப்பிட்ட பிரிவினருக்கு வயது வரம்பில் தளர்வுகள் உண்டு.
தகுதியுள்ள நபர்கள் கணினி வழித் தேர்வு (CBT) மற்றும் நேர்முகத் தேர்வு மூலம் தேர்ந்தெடுக்கப்படுவர். இதற்கான விண்ணப்பக் கட்டணம் ரூ.1,180 ஆகும் (எஸ்சி/எஸ்டி, மாற்றுத்திறனாளிகள் மற்றும் பெண்களுக்குக் கட்டணம் கிடையாது). ஆர்வமுள்ளவர்கள் https://secl-cil.in என்ற இணையதளம் வாயிலாக மே 14, 2026-க்குள் ஆன்லைனில் விண்ணப்பிக்க வேண்டும். நிலக்கரித் துறையில் அரசு வேலை தேடுபவர்களுக்கு இது ஒரு சிறந்த வாய்ப்பாகும்.