“முடிவுக்கு வரும் 20 ஆண்டு விசுவாசம்”… அதிமுகவுக்கு தாவும் திமுகவின் முக்கிய முகம்… செம ஷாக்கில் ஸ்டாலின்….!

மதுரை அரசியலில் நீண்ட காலமாக மு.க.அழகிரியின் நிழலாகவும், அவரது நம்பிக்கைக்குரிய தளபதியாகவும் வலம் வந்த பி.எம். மன்னன், தற்போது அதிமுகவில் இணைய வாய்ப்புள்ளதாகத் தகவல்கள் வெளியாகியுள்ளன. முன்னாள் மத்திய இணை அமைச்சரான மு.க.அழகிரி திமுகவிலிருந்து நீக்கப்பட்ட பின்னரும், அவருடன் தொடர்ந்து பயணித்த ஒரு சில முக்கிய நபர்களில் பி.எம். மன்னன் முதன்மையானவர். கடந்த சில ஆண்டுகளாகவே அழகிரி அரசியல் ரீதியாக அமைதி காத்து வரும் நிலையில், அவரது ஆதரவாளர்கள் மாற்றுப் பாதையைத் தேடி வருகின்றனர்.

பி.எம். மன்னன் மதுரை மாநகராட்சியின் முன்னாள் துணை மேயராகப் பணியாற்றியவர். திமுகவில் மு.க.அழகிரியின் ஆதிக்கம் உச்சத்தில் இருந்த காலகட்டத்தில், மதுரையில் கட்சியின் அனைத்து முக்கிய முடிவுகளையும் முன்னின்று எடுத்தவர் இவர்தான். தென் மாவட்ட அரசியலில் அழகிரியின் ‘வலது கரமாக’ செயல்பட்ட மன்னன், அழகிரியின் குடும்பத்தினருடனும் மிகவும் நெருக்கமான உறவைக் கொண்டிருந்தவர் என்பது குறிப்பிடத்தக்கது.

அழகிரி திமுகவிலிருந்து நீக்கப்பட்ட பிறகு, மன்னன் உள்ளிட்ட அவரது ஆதரவாளர்களும் கட்சியிலிருந்து ஓரங்கட்டப்பட்டனர். நீண்ட காலமாக அழகிரி மீண்டும் அரசியலில் தீவிரமாக செயல்படுவார் அல்லது திமுகவில் மீண்டும் இணைக்கப்படுவார் என்று எதிர்பார்த்து காத்திருந்த மன்னனுக்கு ஏமாற்றமே மிஞ்சியது. இதனால் ஏற்பட்ட அரசியல் வெற்றிடத்தை நிரப்பவும், தனது அரசியல் எதிர்காலத்தைத் தக்கவைத்துக் கொள்ளவும் அவர் அதிமுகவை நோக்கிச் செல்ல முடிவெடுத்துள்ளதாகக் கூறப்படுகிறது.

அதிமுகவில் மன்னன் இணைவது மதுரையில் அக்கட்சிக்கு கூடுதல் பலத்தைத் தரும் என்று அரசியல் விமர்சகர்கள் கருதுகின்றனர். குறிப்பாக, தென் மாவட்டங்களில் திமுகவின் கோட்டையாகக் கருதப்படும் சில பகுதிகளில் இவருக்கென தனி செல்வாக்கு உள்ளது. பி.எம். மன்னன் போன்ற சீனியர் நிர்வாகிகள் அதிமுகவில் இணைந்தால், அது வரவிருக்கும் தேர்தல்களில் மதுரை மண்டலத்தில் முக்கிய மாற்றங்களை ஏற்படுத்தக்கூடும் என எதிர்பார்க்கப்படுகிறது.