தமிழ் சினிமாவில் 50 களில் இருந்து 77 வரை தொடர்ந்து 25 ஆண்டுகளுக்கும் மேலாக முடிசூடா மன்னனாக விளங்கியவர் எம் ஜி ஆர். நடிப்பு மட்டும் இல்லாமல் இயக்கம், பாடல்கள் என பலதுறைகளில் வித்தகராக இருந்தவர் எம் ஜி ஆர். அதனால்தான் அரசியலுக்கு வந்தபோதும் அனைவரையும் தன் கட்டுப்பாட்டில் வைத்து தொடர்ந்து மூன்று தேர்தல்களில் வெற்றி பெற்று முதல்வராக இருந்தார்.
பல வருட போராட்டத்துக்குப் பிறகு எம் ஜி ஆர் ஹீரோவானதும் , அதன் பிறகு பெரும்புகழ் பெற்றதும் உலகறிந்த வரலாறு. அவரின் வளர்ச்சிக்கு அவர் திமுகவில் இருந்ததும் ஒரு காரணம். அதுபோல அவரின் திரையுலக வெற்றி திமுகவுக்கும் பயன்பட்டது. கடவுள் பக்தராக இருந்தாலும் திமுகவில் இருந்ததால் எம் ஜி ஆர் வெளிப்படையாக கோயில்களுக்கு செல்ல மாட்டார். ஆனால் அவர் வீட்டில் அவர் பூஜை செய்வதுண்டு.
எம் ஜி ஆர் வளர்ந்து சூப்பர் ஸ்டார் நடிகர் ஆனதும், அதன் பின்னர் அவருடைய படங்களில் எல்லாவற்றையும் அவர் கட்டுப்பாட்டில் வைத்துக் கொள்வார். பாடல்களுக்கான ட்யூனை ஓக்கே செய்வது முதல் பாடல் வரிகளில் கரெக்ஷன் சொல்வது வரை எல்லா முடிவையும் அவர் எடுப்பார் என்று சொல்வார்கள். இதனால்தான் ஏவிஎம் போன்ற பெருமைமிகு ஸ்டுடியோ அவரை வைத்து அதிக எண்ணிக்கையில் படம் எடுக்கவில்லை என சொல்லப்படுகிறது.
ஏவிஎம் நிறுவனத்துக்காக எம் ஜி ஆர் நடித்த ஒரே ஒரு படம் என்றால் அது அன்பே வா திரைப்படம்தான். அந்த படத்தின் ஷூட்டிங்கின் போது எம் ஜி ஆர் எந்தவொரு குறுக்கீடும் செய்யவில்லை என அந்த படத்தில் உதவி இயக்குனராக பணியாற்றிய இயக்குனர் எஸ் பி முத்துராமன் தெரிவித்துள்ளார்.
இது சம்மந்தமாக அவர்கள் கேட்டபோது அதற்கு எம் ஜி ஆர் இப்படி பதிலளித்தாராம். “நான் ஏன் தெரியுமா எல்லா விஷயங்களிலும் குறுக்கிடுகிறேன். பலருக்கும் ஷாட் எப்படி வைப்பது லட்டிங் எப்படி செய்வது என்பதே தெரியவில்லை. அதனால்தான் நான் ஷூட்டிங்கின் போதே அதை சரி செய்கிறேன். அப்படி செய்யாவிட்டால் அது எனக்கும்தான் அவமானம். ஆனால் இந்த படத்தில் நீங்கள் எல்லாவற்றையும் பக்காவாக செய்கிறீர்கள். அதனால் நான் எந்த குறுக்கிடும் இல்லாமல் நடித்துக் கொடுக்கிறேன்’ என சொன்னாராம்.