“ஒரு மாதமாக ஒரே அறையில்…” இன்ஸ்டாகிராம் சாட்டிங்கால் வந்த விபரீதம்…! 16 வயது சிறுமியின் முகத்தில் சுட்டு கொன்று புதைத்த காதலன்…. உதவிய அண்ணன், மாமா… பகீர் பின்னணி…!!

பெங்களூரு தெற்கு மாவட்டம் கனகபுரா தாலுகாவிற்குட்பட்ட கொடிஹள்ளி காவல் எல்லைக்குட்பட்ட கெம்பலநாதா கிராமத்தில், 16 வயது சிறுமி ஒருவர் அவரது மைனர் காதலனால் துப்பாக்கியால் சுட்டுக் கொல்லப்பட்ட கொடூரமான சம்பவம் ஒரு வாரத்திற்குப் பிறகு தற்பொழுது வெளிச்சத்திற்கு வந்துள்ளது. சமூக ஊடகங்கள் வழியாக அறிமுகமாகிக் காதலித்து வந்த இந்த இரு மைனர்களும், கடந்த ஒரு மாத காலமாகத் தனியாக ஒரே அறையில் வசித்து வந்துள்ளனர்.

இந்நிலையில், கடந்த ஜூலை 10-ஆம் தேதியன்று அந்தச் சிறுமி இன்ஸ்டாகிராமில் வேறொரு சிறுவனுடன் குறுஞ்செய்தி அனுப்பிக் கொண்டிருப்பதை அவரது காதலன் பார்த்துள்ளார். இதனால் ஆத்திரமடைந்த அவன், சிறுமியுடன் கடும் வாக்குவாதத்தில் ஈடுபட்டுத் தனது தாத்தாவின் பழைய கள்ளத்துப்பாக்கியால் சிறுமியின் முகத்திலேயே சுட்டுக் கொன்றுள்ளான். பின்னர், இந்த அதிர்ச்சி குற்றத்தை மறைப்பதற்காகத் தனது 19 வயது அண்ணன் புட்டமாதா மற்றும் 40 வயது மாமா ஹரிஷ் ஆகியோரின் உதவியுடன், தங்களது விவசாய நிலத்திலேயே சிறுமியின் உடலை யாருக்கும் தெரியாமல் புதைத்துள்ளனர்.

சிறுமியின் விபரங்கள் தெரியாமல் தவித்த பெற்றோர் அளித்த காணாமல் போனதாக அளித்த புகாரின் அடிப்படையில், போலீஸார் நடத்திய அதிரடி விசாரணையில் இந்த முழு விவகாரமும் அம்பலமானது. இந்த கொடூரக் கொலைக்கு உடந்தையாக இருந்த மாமா ஹரிஷ், இச்சம்பவம் குறித்துத் தனது நண்பர் ஒருவரிடம் ரகசியமாகப் பகிர்ந்துகொண்ட விஷயம் கிராமம் முழுவதும் வதந்தியாகப் பரவி, இறுதியில் போலீசாரின் காதுகளுக்கு எட்டியுள்ளது.

இதனைத் தொடர்ந்து கொடிஹள்ளி போலீசார் மைனர் சிறுவன் உட்பட மூன்று பேரையும் உடனடியாகக் கைது செய்து, கொலை மற்றும் போக்சோ சட்டத்தின் கீழ் வழக்குப் பதிவு செய்துள்ளனர். மேலும், சிறுமியின் உடலைத் வட்டாட்சியர் முன்னிலையில் தோண்டி எடுத்துப் பிரேதப் பரிசோதனைக்கு அனுப்பியுள்ளனர். சிறுமி தனது பெற்றோரிடம் தோழியின் வீட்டில் இருப்பதாகப் பொய் கூறிவிட்டு இங்கு தங்கியிருந்த நிலையில், மகளின் இருப்பிடத்தை முறையாகக் கண்காணிக்கத் தவறிய பெற்றோரின் அலட்சியமும் இந்தத் துயரத்திற்கு ஒரு காரணமாக அமைந்துவிட்டதாகப் மூத்த போலீஸ் அதிகாரி வேதனையுடன் தெரிவித்துள்ளார்.