திருவள்ளூர் மாவட்டம் ஆவடியை அடுத்த கரலப்பாக்கத்தில் துப்புரவு பணியாளராக வேலை பார்த்து வந்த லதா என்பவர் கொடூரமான முறையில் கொல்லப்பட்ட சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது. கடந்த சில நாட்களாக அவர் வேலைக்குச் செல்லாததாலும், அவரது செல்போன் அணைத்து வைக்கப்பட்டிருந்ததாலும் அவர் உடல்நலக் குறைவால் வீட்டில் ஓய்வெடுப்பதாக சக ஊழியர்கள் எண்ணியுள்ளனர். ஆனால், லதாவின் வீட்டிலிருந்து கடுமையான துர்நாற்றம் வீசியதை அடுத்து அக்கம்பக்கத்தினர் ஜன்னல் வழியாகப் பார்த்துள்ளனர். அங்கு ரத்தக்கறையுடன் ஒரு மூட்டை கிடப்பதைக் கண்டு அதிர்ச்சியடைந்து காவல் கட்டுப்பாட்டு அறைக்குத் தகவல் கொடுத்தனர். சம்பவ இடத்திற்கு வந்த முத்தாபுதுப்பேட்டை காவல்துறையினர் அந்த மூட்டையைப் பிரித்து, அழுகிய நிலையில் இருந்த லதாவின் உடலை மீட்டு பிரேதப் பரிசோதனைக்கு அனுப்பி வைத்தனர்.
இந்தக் கொலை நடந்து சுமார் மூன்று நாட்கள் ஆகியிருக்கலாம் என காவல்துறையினர் முதற்கட்டமாகச் சந்தேகித்தனர். அந்தப் பகுதி ஒரு கிராமப்புறம் என்பதால் அங்கு சிசிடிவி கண்காணிப்பு கேமராக்கள் எதுவும் இல்லை. இது கொலையாளியைக் கண்டுபிடிப்பதில் காவல் துறையினருக்குப் பெரும் சவாலாக அமைந்தது. இதையடுத்து, தொழில்நுட்பத்தின் உதவியை நாடிய போலீசார், உயிரிழந்த லதாவின் செல்போன் அழைப்பு விவரங்களை முழுமையாக ஆய்வு செய்தனர். அதில் ஒரு குறிப்பிட்ட எண்ணில் இருந்து லதாவிடம் அதிக முறை பேசப்பட்டிருப்பதும், அந்த மொபைல் எண் லதாவின் வீட்டின் அருகிலேயே தொடர்ந்து பயன்பாட்டில் இருந்ததும் கண்டுபிடிக்கப்பட்டது.
அந்த செல்போன் சிக்னல் அடிப்படையில் முனிவேல் என்பவரைப் பிடித்து காவல்துறையினர் தீவிர விசாரணை மேற்கொண்டனர். அப்போது, அவருக்கும் லதாவுக்கும் இடையே நெருக்கமான பழக்கம் இருந்ததும், பண விவகாரம் தொடர்பாக இருவருக்கும் இடையில் ஏற்பட்ட வாக்குவாதத்தில் ஆத்திரமடைந்த முனிவேல் லதாவை சுத்தியலால் அடித்துக் கொலை செய்ததும் அம்பலமானது. கொலை செய்ததோடு மட்டுமின்றி, உடல் வெளியே தெரியாமல் இருக்க மூட்டையாகக் கட்டி வைத்துவிட்டு, அவர் மீது எந்த சந்தேகமும் வராதபடி அதே பகுதியிலேயே அவர் சாதாரணமாகச் சுற்றித் திரிந்துள்ளார். எவ்வித சிசிடிவி தடயமும் இல்லாத நிலையிலும், செல்போன் சிக்னலை மட்டுமே வைத்து கொலையாளியைக் கைது செய்து சிறையிலடைத்த காவல்துறையினரின் செயல் அப்பகுதியில் பரபரப்பாகப் பேசப்பட்டு வருகிறது.