“ஆதவ் அர்ஜுனா மாமியார் எடுத்த அதிரடி முடிவு”…. இபிஎஸ் கொடுத்த ‘பிக்’ ஆஃபர்… ஆடிப்போன அரசியல் களம்….!

முன்னாள் லாட்டரி அதிபர் மார்ட்டினின் மனைவியும், இந்திய ஜனநாயக கட்சியின் (ஐஜேகே) முன்னாள் இணைப் பொதுச் செயலாளருமான லீமா ரோஸ் மார்ட்டின், அதிமுக பொதுச்செயலாளர் எடப்பாடி பழனிசாமி முன்னிலையில் அக்கட்சியில் முறைப்படி இணைந்தார். நீண்ட காலமாக ஐஜேகேவில் முக்கியப் பொறுப்புகளை வகித்து வந்த அவர், சமீபத்தில் அக்கட்சியில் இருந்து விலகுவதாக அறிவித்த நிலையில், தற்போது அதிமுகவில் இணைந்துள்ளது அரசியல் வட்டாரத்தில் பெரும் பரபரப்பை ஏற்படுத்தியுள்ளது.

சென்னை பசுமை வழிச்சாலையில் உள்ள எடப்பாடி பழனிசாமியின் இல்லத்தில் இந்த சந்திப்பு நடைபெற்றது. அப்போது, லீமா ரோஸ் மார்ட்டினுக்கு அதிமுகவின் உறுப்பினர் அட்டையை வழங்கி ஈபிஎஸ் அவரை வரவேற்றார். வரும் 2026 சட்டமன்றத் தேர்தலில் போட்டியிட லீமா ரோஸ் ஆர்வம் காட்டி வருவதாகவும், அதன் தொடர்ச்சியாகவே இந்த அரசியல் நகர்வு அமைந்துள்ளதாகவும் கூறப்படுகிறது. குறிப்பாக, திருவாடானை தொகுதியில் போட்டியிட அவர் விருப்பம் தெரிவித்துள்ளதாகத் தெரிகிறது.

லீமா ரோஸ் மார்ட்டினின் இந்த முடிவு, தமிழக அரசியலில் மார்ட்டின் குடும்பத்தின் பன்முகத்தன்மையை வெளிப்படுத்துகிறது. இவரது மருமகன் ஆதவ் அர்ஜுனா தற்போது தமிழக வெற்றிக் கழகத்தில் முக்கிய நிர்வாகியாக உள்ளார். மகன் ஜோஸ் சார்லஸ் மார்ட்டின் புதுச்சேரியில் தனிக்கட்சி நடத்தி வருகிறார். ஒரே குடும்பத்தைச் சேர்ந்தவர்கள் வெவ்வேறு அரசியல் துருவங்களில் பயணிப்பது தற்போதைய தேர்தல் களத்தில் உற்றுநோக்கப்படும் ஒன்றாக மாறியுள்ளது.

எதிர்வரும் சட்டமன்றத் தேர்தலை முன்னிட்டு அதிமுக தனது கூட்டணிகளை வலுப்படுத்தி வரும் வேளையில், லீமா ரோஸ் போன்ற செல்வாக்கு மிக்கவர்களின் வருகை கட்சிக்கு கூடுதல் பலம் சேர்க்கும் என எதிர்பார்க்கப்படுகிறது. வரும் பிப்ரவரி 20-ஆம் தேதி லீமா ரோஸின் ஆதரவாளர்கள் திரளாக அதிமுகவில் இணைய உள்ளதாகவும், இதற்காகப் பிரம்மாண்ட ஏற்பாடுகள் செய்யப்பட்டு வருவதாகவும் தகவல்கள் தெரிவிக்கின்றன. இதன் மூலம் தென் மாவட்டங்களில் அதிமுக தனது செல்வாக்கை உயர்த்தத் திட்டமிட்டுள்ளது.