“சாதியைத் தலைமேல் வைத்துக் கொண்டாடுபவர்களை எனக்கே பிடிக்காது, தவறு நடந்துவிட்டது என்பதை உணர்ந்து வருந்துகிறேன்”… இறுதியில் அவரே வெளியிட்ட உருக்கமான அறிக்கை..!!!

நடிகர் பார்த்திபன் தெலுங்குத் திரைப்பட விழா ஒன்றில் தனது சாதிப் பெயரைக் குறிப்பிட்டுப் பேசியது பெரும் சர்ச்சையை ஏற்படுத்திய நிலையில், அதற்கு அவர் தற்போது மனப்பூர்வமாக மன்னிப்பு கோரியுள்ளார். ஹைதராபாத்தில் நடைபெற்ற ‘உஸ்தாத் பகத் சிங்’ திரைப்படத்தின் ப்ரீ-ரிலீஸ் நிகழ்ச்சியில் பேசிய பார்த்திபன், “தனது முழுப் பெயர் ராதாகிருஷ்ணன் பார்த்திபன் என்றும், தான் ஒரு நாயுடு பையன்” என்றும் குறிப்பிட்டிருந்தார்.

மேலும் முற்போக்குச் சிந்தனையாளராக அறியப்படும் பார்த்திபனிடமிருந்து இத்தகைய சாதிய அடையாளம் சார்ந்த பேச்சை எதிர்பார்க்கவில்லை என சமூக வலைதளங்களில் நெட்டிசன்கள் கடுமையான விமர்சனங்களை முன்வைத்தனர். இந்த விமர்சனங்களுக்குப் பதிலளிக்கும் வகையில் தனது எக்ஸ் தளத்தில் விளக்கமளித்துள்ள பார்த்திபன், எந்தவித உள்நோக்கமும் இன்றி வாய் தவறி அந்த வார்த்தையைப் பயன்படுத்திவிட்டதாகத் தெரிவித்துள்ளார்.

இந்நிலையில் “சாதியைத் தலைமேல் வைத்துக் கொண்டாடுபவர்களை எனக்கே பிடிக்காது, தவறு நடந்துவிட்டது என்பதை உணர்ந்து வருந்துகிறேன்” என்று கூறியுள்ள அவர், தனது திறமையை மட்டுமே நம்புபவன் என்றும், இனி இது போன்ற தவறு நடக்காது என்றும் உறுதி அளித்துள்ளார். மேலும், இந்தப் பேச்சால் வருத்தமடைந்தவர்களிடம் மன்னிப்புக் கேட்டுள்ள அவர், பழையபடி தன்னை ஊக்கப்படுத்துமாறு ரசிகர்களுக்கு வேண்டுகோள் விடுத்துள்ளார்.