நவி மும்பையில், கனரக வாகனங்களுக்குத் தடை விதிக்கப்பட்ட மேம்பாலத்தில் நுழைய முயன்ற சரக்கு லாரி ஒன்று பாதுகாப்பு பேரிகார்டில் சிக்கி விபத்துக்குள்ளானதில் ஓட்டுநர் காயமடைந்ததுடன் அப்பகுதியில் போக்குவரத்து முடங்கியது.
நவி மும்பையின் வாஷி பகுதியில் உள்ள மகாத்மா பூலே சிக்னலில் இருந்து புனே நோக்கிச் சென்ற சரக்கு லாரி ஒன்று, திங்கள்கிழமை அதிகாலை 5 மணியளவில் செக்டார் 17 பகுதியில் உள்ள ‘வாஷி கிளை மேம்பாலத்தில்’ நுழைய முயன்றுள்ளது. இந்த மேம்பாலம் பாம் பீச் சாலையைச் சியோன்-பன்வெல் நெடுஞ்சாலையுடன் இணைக்கும் முக்கியமான பாதையாகும்.
இந்த மேம்பாலத்தில் சிறிய வாகனங்கள் மட்டுமே செல்ல அனுமதிக்கப்பட்டுள்ளதால், கனரக வாகனங்களைத் தடுப்பதற்காக நுழைவாயிலில் தடுப்பு பேரிகார்டுகள் அமைக்கப்பட்டிருந்தன. இருப்பினும் லாரி ஓட்டுநர் ராம்லால் கனாஜி மீனா பேரிகார்டையும் மீறி லாரியை இயக்க முயன்றபோது லாரி தடுப்புகளில் பலமாகச் சிக்கிக் கொண்டது. இச்சம்பவத்தில் ஓட்டுநருக்குக் கையில் லேசான காயம் ஏற்பட்டது.
தகவலறிந்து வந்த வாஷி போக்குவரத்து காவல்துறையினர், சரக்குகள் நிறைந்த லாரியை அப்புறப்படுத்த இரண்டு ‘ஹைட்ரா கிரேன்களை’ வரவழைத்து லாரியை மீட்டனர். இந்த விபத்தால் பாம் பீச் சாலையில் சிறிது நேரம் போக்குவரத்து கடுமையாகப் பாதிக்கப்பட்டதால் இச்செய்தி இணையத்தில் ஹாட் டாபிக்காக மாறியுள்ளது.