சம்பல் நதிக்கரையில் கால்நடைகளுக்குத் தண்ணீர் புகட்டிக் கொண்டிருந்த பன்னே சிங் என்பவரை, ஆற்றில் மறைந்திருந்த 400 கிலோ எடையுள்ள முதலை ஒன்று திடீரெனத் தாக்கியது. நொடிப் பொழுதில் அவரது காலைக் கவ்விப் பிடித்த அந்த மாபெரும் முதலை, அவரை ஆழமான ஆற்றுப் பகுதிக்கு இழுத்துச் செல்லத் தொடங்கியது. மரண பயத்தில் உறைந்துபோன பன்னே சிங், தன் வாழ்நாள் முடிந்துவிட்டது என்றே முடிவு செய்துவிட்டார்.
அப்போது அருகில் இருந்த அவரது மனைவி விமல் பாய், ஒரு கணமும் தாமதிக்காமல் தன் உயிரைப் பணையம் வைத்து ஆற்றில் குதித்தார். கையில் கிடைத்த ஒரு தடியைக் கொண்டு முதலையின் தலையில் அடுத்தடுத்துக் கொடூரமாகத் தாக்கினார். கணவனைப் பெற வேண்டும் என்ற அசாத்திய துணிச்சலுடன் முதலையின் தாடைகளில் இருந்து அவரைப் போராடி மீட்டு, நதியின் கரையேற்றினார்.
“என் கணவரை விட எனக்கு வேறு எதுவுமே முக்கியமில்லை; அவரைக் காப்பாற்றும் முயற்சியில் என் உயிரே போயிருந்தாலும் மகிழ்ச்சியோடு ஏற்றிருப்பேன்” என்று கூறும் விமல் பாயின் இந்த வீரத்தைப் பாராட்டி, கிராம மக்கள் அவரை ‘சிங்கப் பெண்மணி’ எனப் போற்றி மகிழ்கின்றனர். காரௌலி மாவட்டத்தின் மண்டராயல் பகுதியில் நடந்த இந்தச் சம்பவம், இந்தியப் பெண்களின் தியாகத்திற்கும் அஞ்சா நெஞ்சத்திற்கும் மற்றுமொரு சான்றாகத் திகழ்கிறது.