“என் இஷ்டம்… நீ யாரு கேட்க…?” – விதியை மீறி பேத்தியை கார் ஓட்ட வைத்துவிட்டு… பொதுமக்களிடம் மிரட்டல் விடுத்த போலீஸ் அதிகாரி…!!

ஹைதராபாத்தில் பரபரப்பான பொதுச் சாலையில் தனது 6 வயது பேத்தியை கார் ஓட்ட அனுமதித்த காவல் துறை சப்-இன்ஸ்பெக்டர் புஜாரி திருப்பதி என்பவர் மீது போலீஸார் வழக்குப் பதிவு செய்துள்ளனர். தெலுங்கானாவின் ரங்காரெட்டி மாவட்டத்தில் ஜூலை 11 அன்று இந்த அதிர்ச்சி தரும் சம்பவம் நடந்துள்ளது. இதுதொடர்பான வீடியோ சமூக வலைதளங்களில் வெளியாகி வைரலானதை அடுத்து இந்த நடவடிக்கை எடுக்கப்பட்டுள்ளது.

வைரலான அந்த வீடியோவில், சிறுமி காரின் ஸ்டீயரிங்கை பிடித்துக்கொண்டு மிக மெதுவாக காரை ஓட்டிச் செல்வதும், அருகில் இருக்கும் சப்-இன்ஸ்பெக்டர் அவருக்கு வழிகாட்டுவதும் பதிவாகியுள்ளது. கார் மிகவும் மெதுவாகச் சென்றதால் அந்தச் சாலையில் கடும் போக்குவரத்து நெரிசல் ஏற்பட்டது. இதைப் பார்த்த அப்பகுதி மக்கள் காரை வழிமறித்து அந்த அதிகாரியிடம் கேள்வி எழுப்பியபோது, அவர் “இது என் இஷ்டம், கேட்க நீங்கள் யார்?” என்று அலட்சியமாகப் பதிலளித்ததாகக் கூறப்படுகிறது. மேலும், தனது பேத்தியை மிகக் குறைந்த வயதில் கார் ஓட்டியதற்கான ‘கின்னஸ் சாதனை’ படைக்க வைக்கவே இவ்வாறு பயிற்சி அளித்ததாகவும் அவர் வாதிட்டுள்ளார்.

பொதுமக்களின் உயிருக்கு ஆபத்து விளைவிக்கும் வகையில் செயல்பட்டது மற்றும் மைனர் சிறுமியை வாகனம் ஓட்ட அனுமதித்தது போன்ற குற்றங்களுக்காக, அந்த சப்-இன்ஸ்பெக்டர் மீது பாரதிய நியாய சன்ஹிதா பிரிவு 125 மற்றும் மோட்டார் வாகனச் சட்டத்தின் கீழ் போலீஸார் வழக்குப் பதிவு செய்துள்ளனர். இச்சம்பவம் குறித்து போலீஸார் தொடர்ந்து தீவிர விசாரணை நடத்தி வருகின்றனர்.