2026 தமிழக சட்டமன்றத் தேர்தல் நெருங்கி வரும் வேளையில் அமமுக பொதுச்செயலாளர் டிடிவி தினகரன் எடுத்துள்ள அதிரடி முடிவு அரசியல் வட்டாரத்தில் பெரும் பரபரப்பை ஏற்படுத்தியுள்ளது. தான் போட்டியிடப் போவதாக முன்பு அறிவித்திருந்த கோவில்பட்டி தொகுதியிலிருந்து பின்வாங்கியுள்ள அவர், வரவிருக்கும் சட்டமன்றத் தேர்தலில் தாம் போட்டியிடப் போவதில்லை என்று அதிகாரப்பூர்வமாக அறிவித்துள்ளார். இது அவரது ஆதரவாளர்கள் மற்றும் அரசியல் விமர்சகர்களிடையே பல்வேறு கேள்விகளை எழுப்பியுள்ளது.
பாஜக தலைமையிலான தேசிய ஜனநாயகக் கூட்டணியில் அதிமுகவுடன் இணைந்து பயணிக்க தினகரன் முடிவு செய்துள்ளார். ஒரு காலத்தில் எடப்பாடி பழனிசாமியை மிகக்கடுமையாக விமர்சித்த தினகரன், தற்போது தமிழக மக்களின் நலனுக்காகவும், அமித் ஷாவின் வேண்டுகோளுக்கு இணங்கவும் கருத்து வேறுபாடுகளை மறந்து அதிமுகவுடன் கைகோர்த்துள்ளதாகக் கூறியுள்ளார். இந்த திடீர் கூட்டணி மாற்றம் காரணமாக, அவரது முக்கிய ஆதரவாளர்கள் சிலர் அதிருப்தியில் அமமுகவை விட்டு வெளியேறி திமுகவில் இணைந்து வருவது கட்சிக்கு ஒரு பின்னடைவாகப் பார்க்கப்படுகிறது.
தேர்தலில் போட்டியிடாமல் ஒதுங்கியிருப்பதற்குப் பின்னால் ஒரு நீண்டகால அரசியல் கணக்கு இருப்பதாகக் கருதப்படுகிறது. களத்தில் நேரடியாகப் போட்டியிட்டு வெற்றி வாய்ப்பு குறித்து ரிஸ்க் எடுப்பதற்குப் பதிலாக, தேசிய ஜனநாயகக் கூட்டணியின் மூலம் டெல்லி அரசியலில் கால்பதிக்க தினகரன் திட்டமிட்டுள்ளதாகத் தெரிகிறது. இதற்காக அவர் பாஜக தலைமையிடம் தனக்கு ஒரு மாநிலங்களவை (ராஜ்யசபா) உறுப்பினர் பதவியை ஒதுக்குமாறு கோரிக்கை வைத்துள்ளதாக அரசியல் வட்டாரங்கள் தெரிவிக்கின்றன.
தற்போது ஓ. பன்னீர்செல்வத்தை கழற்றிவிட்டு எடப்பாடி பழனிசாமியுடன் கைகோர்த்துள்ள தினகரன், தனது அரசியல் எதிர்காலத்தை மத்திய அரசின் ஆதரவுடன் பலப்படுத்த முயல்கிறார். 2026 தேர்தலில் போட்டியிடாவிட்டாலும், ராஜ்யசபா எம்.பி சீட் கிடைத்தால் அதன் மூலம் தனது அரசியல் செல்வாக்கை தக்கவைத்துக்கொள்ள முடியும் என்பதே தினகரனின் தற்போதைய வியூகமாக உள்ளது. அமித் ஷாவின் தலையீட்டால் ஏற்பட்டுள்ள இந்த அதிமுக-அமமுக இணக்கம், தினகரனை நாடாளுமன்றத்திற்கு அனுப்ப வழிவகை செய்யுமா என்பதைப் பொறுத்திருந்துதான் பார்க்க வேண்டும்.