விஜய்யுடன் கூட்டணி எங்களுக்கு பிடிக்கல… பதவியை ராஜினாமா செய்த காங்கிரஸ் முக்கிய புள்ளிகள்… அடுத்தடுத்து பரபரப்பு..!!

தமிழக அரசியலில் நிலவும் தற்போதைய சூழலில், தமிழக வெற்றிக் கழகத்துடன் (தவெக) காங்கிரஸ் கட்சி கூட்டணி அமைத்திருப்பதற்கு எதிர்ப்பு கிளம்பியுள்ளது. இதன் வெளிப்பாடாக, காங்கிரஸ் கட்சியின் முன்னாள் மாநிலச் செயலாளர் தயானந்த் கார்த்திக் மற்றும் பிரனேஷ் பாலாஜி ஆகியோர் தங்களது பதவிகளை ராஜினாமா செய்துள்ளனர். திமுக-வுடன் இணைந்து கடந்த தேர்தலைச் சந்தித்துவிட்டு, தற்போது தவெக-வுடன் கைகோர்ப்பது என்பது ஒரு “சந்தர்ப்பவாத அரசியல்” என்று அவர்கள் கடுமையாக விமர்சித்துள்ளனர். இது தொடர்பான தங்களது ராஜினாமா கடிதங்களைத் தேசிய தலைமைக்கு அவர்கள் அனுப்பியுள்ளதோடு, கட்சியில் மேலும் பல நிர்வாகிகள் அதிருப்தியில் இருப்பதாகத் தகவல்கள் தெரிவிக்கின்றன.

இந்த அரசியல் மாற்றங்களுக்கு மத்தியில், தவெக தலைவர் விஜய்க்குப் பெரும்பான்மையை நிரூபிப்பதில் புதிய சிக்கல்கள் எழுந்துள்ளன. அறுதிப் பெரும்பான்மைக்குத் தேவையான 118 எம்.எல்.ஏ-க்களின் ஆதரவு தவெக-விற்கு இல்லை என்பதால், விஜய்க்குப் பதவிப்பிரமாணம் செய்து வைக்கக் கூடாது என ஆளுநருக்குக் கடிதம் அனுப்பப்பட்டுள்ளது. அதே வேளையில், தவெக-விற்குத் தங்கள் கட்சியின் ஆதரவு கிடையாது என அதிமுக திட்டவட்டமாகத் தெரிவித்துள்ளதும் குறிப்பிடத்தக்கது. இவ்வாறு ஒருபுறம் காங்கிரஸுடனான கூட்டணி அதிருப்தியை ஏற்படுத்தியிருக்க, மறுபுறம் திமுக மூத்த தலைவர் ஆர்.எஸ். பாரதி காங்கிரஸை “நன்றி கெட்டவர்கள்” என விமர்சித்து எதிர்காலத்தில் அவர்களை எதிர்த்து அரசியல் செய்வோம் எனக் கூறியுள்ளார்.