“5 முன்னாள் அமைச்சர்கள், 10 முன்னாள் எம்.எல்.ஏ-க்கள்”…. ஒரே நாளில் 15,000 பேர்…. விஜய்யின் கூடாரத்திற்கு மாறும் தமிழக அரசியல்…. அதிமுகவில் உச்சக்கட்ட பரபரப்பு…!

தமிழ்நாட்டில் தற்போதைய அரசியல் சூழலில், பிரதான எதிர்க்கட்சியான அதிமுகவில் இருந்து முக்கியப் புள்ளிகள் விலகி, நடிகர் விஜய்யின் தமிழக வெற்றிக் கழகத்தில் இணைவது பெரும் பரபரப்பை ஏற்படுத்தியுள்ளது. ஏற்கனவே 4 சிட்டிங் எம்எல்ஏ-க்கள் தங்கள் பதவிகளை ராஜினாமா செய்துவிட்டு தவெகவில் இணைந்துள்ள நிலையில், தற்போது அதிமுகவின் முன்னாள் அமைச்சர்களான சி.விஜயபாஸ்கர், எம்.ஆர்.விஜயபாஸ்கர், எம்.எஸ்.எம்.ஆனந்தன் மற்றும் எஸ்.வளர்மதி ஆகியோர் நாளை தவெகவில் இணைவது உறுதியாகி இருக்கிறது. இவர்களுடன் முன்னாள் எம்எல்ஏ-க்களான தமிழ்ச்செல்வன், ராம் குமார், திருஞானசம்பந்தன் மற்றும் ராஜவர்மன் ஆகியோரும் தவெகவில் ஐக்கியமாக உள்ளதாகத் தகவல்கள் வெளியாகியுள்ளன.

நாளை காலை மாமல்லபுரத்தில் உள்ள ஒரு தனியார் விடுதியில் இந்த பிரம்மாண்ட இணைப்பு விழா நடைபெறுவதற்கான ஏற்பாடுகள் தீவிரமாகச் செய்யப்பட்டுள்ளன. தவெக பொதுச்செயலாளர் புஸ்ஸி ஆனந்த் மற்றும் ஆதவ் அர்ஜுனா ஆகியோர் தலைமையில் இந்த விழா நடக்கவுள்ளது. இந்த இணைப்பு விழாவில் கலந்துகொண்டு தவெகவில் தங்களை இணைத்துக் கொண்ட பிறகு, முன்னாள் அமைச்சர்கள் நால்வரும் கட்சியின் தலைவர் விஜய்யை நேரில் சந்தித்து வாழ்த்து பெற உள்ளதாகவும் அறிவாலய வட்டாரங்கள் தெரிவிக்கின்றன.

இந்த கட்சித் தாவல் வெறும் தலைவர்களோடு மட்டும் நின்றுவிடாமல், மாவட்ட அளவிலும் அதிமுகவுக்குப் பலத்த அடியைக் கொடுத்துள்ளது. புதுக்கோட்டை மாவட்டத்தைச் சேர்ந்த அதிமுகவின் 59 பொதுக்குழு உறுப்பினர்களும், கரூர் மாவட்டத்தைச் சேர்ந்த 49 பொதுக்குழு உறுப்பினர்களும் இவர்களுடன் தவெகவில் இணையவிருக்கின்றனர். ஒட்டுமொத்தமாக இந்த இரு மாவட்டங்களில் இருந்து மட்டுமே சுமார் 15 ஆயிரத்திற்கும் மேற்பட்ட நிர்வாகிகள் மற்றும் தொண்டர்கள் தவெகவில் ஐக்கியமாக உள்ளதால், அக்கட்சியின் தலைமை மிகுந்த உற்சாகத்தில் ஆழ்ந்துள்ளது.

தமிழ்நாட்டில் ஆட்சி மாற்றம் ஏற்பட்டதில் இருந்தே, அதிமுகவில் இருந்து ஏராளமான நிர்வாகிகள் விலகி தவெகவை நோக்கிச் செல்வது நாளுக்கு நாள் அதிகரித்து வருகிறது. இன்று மாலை தவெக தனது அதிகாரப்பூர்வக் கூட்டணியை உறுதி செய்ய உள்ள சூழலில், நாளை நடைபெறவுள்ள இந்த பிரம்மாண்ட சேர்க்கை கட்சியை அடிமட்ட அளவில் மேலும் வலுப்படுத்தும் நடவடிக்கையாகப் பார்க்கப்படுகிறது. இந்த தொடர் நகர்வுகள் மூலம் தவெகவின் அரசியல் பலம் தமிழகத்தில் கணிசமாக உயர்ந்து கொண்டே செல்வது மற்ற கட்சிகளிடையே உற்று நோக்கத்தக்கதாக மாறியுள்ளது.