தமிழ்நாடு பாஜகவின் செல்வாக்குமிக்க பதவியான மாநில அமைப்புப் பொதுச் செயலாளர் பொறுப்பிலிருந்து கேசவ விநாயகம் அதிரடியாக மாற்றப்பட்டுள்ளார். சென்னையில் பிப்ரவரி 9, 2026 அன்று நடைபெற்ற ஆர்.எஸ்.எஸ் – பாஜக முக்கிய நிர்வாகிகள் கூட்டத்தில் இந்த முடிவு எடுக்கப்பட்டதாகத் தகவல்கள் தெரிவிக்கின்றன. கடந்த 2015 முதல் இந்தப் பொறுப்பில் இருந்த அவர், தற்போது ஆர்.எஸ்.எஸ் அமைப்பில் வேறு பணிகளுக்கு மாற்றப்பட வாய்ப்புள்ளதாகக் கூறப்படுகிறது.
தமிழக பாஜகவின் முன்னாள் தலைவர் அண்ணாமலைக்கும், கேசவ விநாயகத்திற்கும் இடையே நீண்டகாலமாக நிலவி வந்த கருத்து வேறுபாடுகள் மற்றும் அண்ணாமலை தரப்பு முன்வைத்த புகார்களே இந்த மாற்றத்திற்கு முக்கிய காரணமாகக் கருதப்படுகிறது. எதிர்வரும் சட்டமன்றத் தேர்தலை முன்னிட்டு, தேர்தல் முடியும் வரை, ஒரு கூட்டுத் தலைமையின் கீழ் கட்சியின் நிர்வாகப் பணிகளைக் கொண்டு வரவும் கட்சி மேலிடம் திட்டமிட்டுள்ளதாகத் தெரிகிறது. இந்நிலையில், தற்போது தமிழக ஆர்.எஸ்.எஸின் அமைப்பு பொதுச்செயலாளர் பிரஷோப குமார், பாஜக அமைப்பு பொதுச்செயலாளராக நியமனம் செய்யப்பட்டுள்ளார்.