ஹிட் ஆனதே ஒரு படம்தான், அடுத்த படத்துக்கு இவ்வளவு கோடி சம்பளமா? கவினின் திடீர் மாற்றத்தால் திணறும் தயாரிப்பாளர்கள்

விஜய் தொலைக்காட்சியில் “கனா காணும் காலங்கள் கல்லூரி சாலை” என்ற மிகப் பிரபலமான சீரீயலின் மூலம் மக்களிடையே அறியப்பட்டவர் கவின். அதன் பின் விஜய் தொலைக்காட்சியில் “தாயுமானவன்”, “சரவணன் மீனாட்சி சீசன் 2” போன்ற சீரீயல்களில் நடித்தார். அவர் சீரீயலில் நடித்துக்கொண்டிருந்த காலகட்டத்திலேயே இளம் பெண்களின் மத்தியில் அவருக்கு அதிக வரவேற்பு இருந்தது.

ஒரு புறம் சீரியல்களில் கவனம் செலுத்திக்கொண்டிருந்த கவின், “பீட்சா”, “இன்று நேற்று நாளை”, “சத்ரியன்” போன்ற திரைப்படங்களில் சின்ன சின்ன கதாபாத்திரங்களில் நடித்தார். அதன் பின் “நட்புன்னா என்னனு தெரியுமா?” என்ற திரைப்படத்தின் மூலம் ஹீரோவாக களமிறங்கினார் கவின். அத்திரைப்படம் சுமாராகவே ஓடியது.

அதனை தொடர்ந்து கவின் ஹீரோவாக நடித்த “லிஃப்ட்” திரைப்படம் ஓரளவு நல்ல வரவேற்பை பெற்றிருந்தது. “லிஃப்ட்” திரைப்படத்தை தொடர்ந்து கவின் நடித்த “டாடா” திரைப்படம் அவரை வேறு ஒரு தளத்திற்கு கொண்டுசென்றது. “டாடா” திரைப்படம் மிகப்பெரிய வெற்றியை பெற்றதால் கவின் கோலிவுட்டில் கவனம் பெற்ற ஹீரோவாக மாறினார்.

“டாடா” திரைப்படத்தின் மாபெரும் வெற்றியைத் தொடர்ந்து தற்போது “ஸ்டார்” திரைப்படத்தில் நடித்து வருகிறார் கவின். இதனிடையே “டாடா” திரைப்படத்தின் வெற்றிக்குப் பிறகு கவின் தனது சம்பளத்தை இரண்டு கோடியாக உயர்த்தியுள்ளதாக சில தகவல்கள் வெளிவந்தன.

“ஹிட் அடித்ததே ஒரு திரைப்படம்தான், அதற்குள் இரண்டு கோடி சம்பளமா” என்று கோலிவுட் வட்டாரங்களில் முணுமுணுப்புகள் எழுந்தன. இந்த நிலையில் தற்போது கவின் குறித்து மேலும் ஒரு தகவல் வெளிவந்துள்ளது.

அதாவது கவின் தற்போது தனது சம்பளத்தை 7 கோடியாக உயர்த்தியுள்ளாராம். கவின் தனது சம்பளத்தை 2 கோடியில் இருந்து 7 கோடிக்கு உயர்த்தியுள்ள செய்தி கோலிவுட் தயாரிப்பாளர்களிடையே அதிர்ச்சியை ஏற்படுத்தியுள்ளதாக தகவல்கள் தெரிவிக்கின்றன.