கண் வைத்த கனிமொழி… க்ரீன் சிக்னல் கொடுக்காத ’உடன்பிறப்பு’…. இது ‘வாரிசு’ அரசியலின் அடுத்த அத்தியாயமா?… 2026-ல் நடக்கப்போவது என்ன?….!

2026 சட்டமன்றத் தேர்தல் களம் தமிழகத்தில் முன் எப்போதும் இல்லாத வகையில் பெரும் பரபரப்பை ஏற்படுத்தியுள்ளது. இந்தத் தேர்தலில் திமுக, அதிமுக, பாஜக, நாம் தமிழர் மற்றும் ராமதாஸ்-சசிகலா அணி என ஐந்து முனைப் போட்டி உருவாகியுள்ள சூழலில், திமுக கூட்டணியில் முதல்முறையாக தேமுதிக இணைந்திருப்பது அரசியல் வட்டாரங்களில் வியப்பை ஏற்படுத்தியுள்ளது. முதலமைச்சர் ஸ்டாலின் தலைமையில் தொகுதிப் பங்கீடு, வேட்பாளர் நேர்காணல் மற்றும் தேர்தல் அறிக்கை தயாரிப்புப் பணிகள் என திமுக கூட்டணி தேர்தல் பணிகளில் வேகம் காட்டி வரும் நிலையில், அக்கட்சியின் துணைப் பொதுச் செயலாளர் கனிமொழி அவர்களின் அரசியல் நகர்வுகள் தற்போது விவாதப் பொருளாக மாறியுள்ளன.

தூத்துக்குடி நாடாளுமன்ற உறுப்பினராகவும், டெல்லி அரசியலில் திமுகவின் முக்கிய முகமாகவும் விளங்கும் கனிமொழி, இந்த முறை மாநில அரசியலில் நேரடியாகத் தடம் பதிக்கத் திட்டமிட்டுள்ளதாகத் தெரிகிறது. தென் மாவட்டங்களில் அவருக்குக் கிடைத்து வரும் அபரிமிதமான வரவேற்பும், ஆதரவாளர்களின் கோரிக்கையும் அவரை சட்டமன்றத் தேர்தலில் போட்டியிடத் தூண்டியுள்ளன. குறிப்பாக, தூத்துக்குடி, திருநெல்வேலி, பாளையங்கோட்டை உள்ளிட்ட பத்து தொகுதிகளில் அவரது ஆதரவாளர்கள் கனிமொழிக்காக விருப்ப மனுக்களைத் தாக்கல் செய்திருப்பது, அவர் மாநில அரசியலுக்கு வருவதில் எவ்வளவு உறுதியாக இருக்கிறார் என்பதைக் காட்டுகிறது.

இருப்பினும், கனிமொழியின் இந்த அதிரடி முடிவுக்கு கட்சியின் மேலிடம் இன்னும் பச்சைக்கொடி காட்டவில்லை என்றே கூறப்படுகிறது. டெல்லி அரசியலில் திமுகவின் செல்வாக்கை நிலைநிறுத்த கனிமொழி போன்ற ஆளுமைகள் அங்கேயே நீடிப்பது அவசியம் என தலைமை கருதுவதாகத் தெரிகிறது. அதே வேளையில், கனிமொழி சட்டமன்ற உறுப்பினராகத் தேர்வாகி மாநில அரசியலில் செல்வாக்கு பெற்றால், அது கட்சியின் ‘எதிர்கால தலைமை’ குறித்த சமன்பாடுகளில் மாற்றத்தை ஏற்படுத்தக்கூடும் என்ற அச்சமும் கட்சிக்குள் ஒரு தரப்பினரிடையே நிலவுவதாக அரசியல் பார்வையாளர்கள் கருதுகின்றனர்.

தற்போது நடைபெற்று வரும் வேட்பாளர் நேர்காணல்களின் போது, தனது விருப்பத்தை முதலமைச்சர் ஸ்டாலினிடம் தெரிவிக்க கனிமொழி முயன்றாலும், தலைமை தரப்பிலிருந்து இதுவரை எவ்வித அதிகாரப்பூர்வ சிக்னலும் கிடைக்கவில்லை. தமிழகத்தின் தென் மாவட்டங்களில் ஒரு தொகுதியைத் தனக்காகத் தயார்படுத்தி வரும் கனிமொழிக்கு, கட்சித் தலைமை வாய்ப்பளிக்குமா அல்லது மீண்டும் டெல்லி அரசியலுக்கே அவரை வழிநடத்துமா என்பது மில்லியன் டாலர் கேள்வியாக உருவெடுத்துள்ளது. 2026 தேர்தல் திமுகவிற்குள் நிலவும் இந்த ‘உள்ளூர் vs டெல்லி’ அரசியலில் யாருடைய கை ஓங்கும் என்பதைப் பொறுத்திருந்துதான் பார்க்க வேண்டும்.