நான் கஷ்டப்பட்டு நடிச்சா, ராமராஜன் ஈஸியா என்ன விட மூன்று மடங்கு லாபம் பாத்துட்டார்- கமல்ஹாசன் பகிர்ந்த தகவல்!

தமிழ் சினிமாவின் பேராளுமைகளில் ஒருவரான கமல்ஹாசன் 90 களில் பல பரிசோதனை முயற்சி படங்களாக நடித்துக் கொண்டிருந்தார். அதனால் அவரின் பல படங்கள் கமர்ஷியலாக வெற்றி பெறாமல் தோல்வி அடைந்தன. ஆனால் காலம் சென்று அந்த படங்கள் இன்றும் கல்ட் கிளாசிக் படங்களாக கொண்டாடப்பட்டு வருகின்றன.

கமல்ஹாசன் நடிப்பில் உருவான பல தோல்வி படங்கள் காலம் தாண்டி ரசிகர்களால் கொண்டாடப்பட்டு வருகின்றன. ராஜபார்வை, விக்ரம், குணா, ஹேராம் போன்ற படங்களே அதற்கு உதாரணம். அதே போல அவர் கஷ்டப்பட்டு உருவாக்கிய படங்களில் வெற்றி பெற்ற திரைப்படம்தான் அபூர்வ சகோதரர்கள்.

அந்த படத்தில் இரட்டை வேடத்தில் நடித்த கமல்ஹாசன், ஒரு வேடத்தில் குள்ளமானவராக நடித்தார். அந்த படத்துக்காக அவர் மிகவும் கஷ்டப்பட்டு பல தந்திரமான ஷாட்களில் நடித்து அந்த வேடத்தில் நடித்தார். அது இப்போது வரை ரசிகர்களால் வெகுவாக சிலாகிக்கப்பட்டு வருகிறது.

இந்த படத்தின் ரிலீஸின் போது வெளியான ராமராஜனின் கரகாட்டக்காரன் திரைப்படம் பிளாக்பஸ்டர் ஹிட்டாகி அபூர்வ சகோதரர்கள் படத்தை விட அதிக வசூல் செய்து கலக்கியது. இந்த படம் பற்றி சமீபத்தில் ஒரு நிகழ்ச்சியில் பேசிய கமல்ஹாசன் “நான் கஷ்டப்பட்டு கையைக் காலைக் கட்டிக் கொண்டு நடித்தால், சகோதரர் ராமராஜன் தலையில் ஒரு கரகத்தை வைத்துக் கொண்டு என்னை விட மூன்று மடங்கு அதிக வசூலை செய்துவிட்டார்” என்று ஜாலியாகப் பேசியுள்ளார்.

அபூர்வ சகோதரர்கள் படம் கரகாட்டக்காரன் அளவுக்கு வெற்றி பெறவில்லை என்றாலும் இன்றளவும் கல்ட் கிளாசிக் படமாக கொண்டாடப்படுகிறது என்பது குறிப்பிடத்தக்கது.