அதிமுகவுக்கு அடுத்த ஷாக்…. தவெக பக்கம் தாவுகிறாரா நத்தம் விஸ்வநாதன்?…. கொங்கு மண்டலத்தை ஆட்டிப்படைக்கும் புதுப் புயல்…. பரபரப்பு தகவல்….!

அதிமுகவின் மூத்த தலைவரும் முன்னாள் அமைச்சருமான நத்தம் விஸ்வநாதன், கடந்த சில நாட்களாகவே பொதுநிகழ்வுகளிலோ அல்லது கட்சித் திட்டங்களிலோ அதிகம் தென்படாதது திண்டுக்கல் மாவட்ட அதிமுக தொண்டர்கள் மற்றும் நிர்வாகிகளிடையே பெரும் குழப்பத்தையும் பரபரப்பையும் ஏற்படுத்தியுள்ளது. எடப்பாடி பழனிச்சாமியுடன் ஏற்பட்ட கருத்து வேறுபாடு காரணமாக, சி.வி.சண்முகம் மற்றும் எஸ்.பி.வேலுமணி தலைமையிலான அதிருப்தி அணியில் இணைந்து செயல்பட்டு வந்த இவர், சமீபகாலமாக அதிமுகவின் எந்தவொரு அதிகாரப்பூர்வ நிகழ்வுகளிலும் கலந்துகொள்ளாமல் முற்றிலுமாக விலகியிருப்பது கட்சியின் உள்வீட்டுப் பூசலை மீண்டும் வெளிச்சத்திற்குக் கொண்டுவந்துள்ளது.

2026 தமிழக சட்டசபை தேர்தலில் தமிழக வெற்றிக் கழகம் வெற்றி பெற்று ஆட்சியைக் கைப்பற்றிய நிலையில், தமிழகத்தை நீண்டகாலம் ஆட்சி செய்த பெருமைமிக்க அதிமுக வரலாற்றுப் பின்னடைவைச் சந்தித்து மூன்றாவது இடத்திற்குத் தள்ளப்பட்டது. தேர்தல் தோல்விக்குப் பிறகு, திமுக-அதிமுக கூட்டணி குறித்த வதந்திகளும், எடப்பாடி பழனிச்சாமி பொதுச்செயலாளர் பதவியிலிருந்து விலகக் கோரி சி.வி.சண்முகம்-வேலுமணி அணியினர் நடத்திய திடீர் எதிர்ப்புகளும் கட்சிக்குள் பெரும் புயலைக் கிளப்பின. தவெக அரசுக்கு ஆதரவாக வாக்களித்த அதிருப்தி எம்.எல்.ஏ.க்களின் பதவிகளை எடப்பாடி பறித்த போதிலும், விஜயபாஸ்கர் மற்றும் சத்தியபாமா போன்ற முக்கிய நிர்வாகிகள் அதிமுகவிலிருந்து விலகி தவெகவில் இணைந்தனர்.

இந்தச் சூழலில், மறைந்த முன்னாள் முதல்வர் ஜெயலலிதாவின் நம்பிக்கைக்குரிய ஐந்து தளபதிகளில் ஒருவராகத் திகழ்ந்த நத்தம் விஸ்வநாதன், தற்போதைய அரசியல் சூழலில் எவ்வித முடிவும் எடுக்க முடியாமல் இரட்டைத் தோணியில் பயணிப்பது போல் செய்வதறியாது தவித்து வருகிறார். 2021 தேர்தலில் ஆத்தூரில் போட்டியிட்டுத் தோல்வியடைந்த அவர், 2026 தேர்தலில் மீண்டும் தனது சொந்தத் தொகுதியான நத்தத்திற்குத் திரும்பி வெற்றி பெற்றார். இருப்பினும், அண்மையில் முடிவடைந்த சட்டமன்ற வரவு-செலவுத் திட்டக் கூட்டத்தொடருக்குப் பிறகு, அவர் தனது சொந்தத் தொகுதியிலும் சரி, பொதுவெளியிலும் சரி தலைகாட்டுவதைத் தவிர்க்கத் தொடங்கியுள்ளார்.

திண்டுக்கல்லில் உள்ள கட்சியின் மாவட்டத் தலைமையகத்தை திண்டுக்கல் சீனிவாசன் முழுமையாகத் தனது கட்டுப்பாட்டில் கொண்டுவந்துவிட்டதால், நத்தம் விஸ்வநாதன் கட்சி அலுவலகப் பக்கமும் வருவதில்லை என்று கூறப்படுகிறது. எடப்பாடி பழனிச்சாமியின் தலைமை மீதான அதிருப்தி மற்றும் உட்கட்சிப் பூசல் காரணமாகவே அவர் அதிமுக நிகழ்வுகளைப் புறக்கணித்து வருகிறார் என அவருடைய ஆதரவாளர்கள் தெரிவிக்கின்றனர். அதேவேளையில், லேசான உடல்நலக் குறைவு காரணமாகவே அவர் வீட்டில் ஓய்வெடுத்து வருகிறார் என்றும், விரைவில் அவர் தனது அரசியல் நடவடிக்கைகளைத் தொடர்வார் என்றும் நத்தம் தொகுதி மக்கள் மத்தியில் பேசப்பட்டு வருகிறது.