லெபனானின் அல்-காஸ்மியா (Al-Qasmiya) பாலத்தின் அருகே போர்ச் சூழல் குறித்து செய்தி சேகரித்துக் கொண்டிருந்த ரஷ்யத் தொலைக்காட்சியைச் சேர்ந்த செய்தியாளர் ஸ்டீவ் ஸ்வீனி மற்றும் ஒளிப்பதிவாளர் அலி ரிடா ஆகியோர், இஸ்ரேலிய ஏவுகணைத் தாக்குதலில் இருந்து நூலிழையில் உயிர் தப்பினர். அவர்கள் நின்றிருந்த இடத்திற்கு மிக அருகாமையிலேயே ஏவுகணை வந்து விழுந்து வெடித்தது. இந்தத் தாக்குதலின் தாக்கத்தால் இருவரும் காயமடைந்த நிலையில், உடனடியாக மீட்கப்பட்டு அருகில் உள்ள மருத்துவமனையில் அவசர சிகிச்சைக்காக அனுமதிக்கப்பட்டுள்ளனர்.
தாக்குதலின் போது செய்தியாளர்கள் இருவரும் ஊடகவியலாளர்கள் என்பதை உறுதிப்படுத்தும் “PRESS” என்ற அடையாள முத்திரையிடப்பட்ட கவச உடைகளை அணிந்திருந்தனர். சர்வதேச விதிகளின்படி போர்க்களத்தில் ஊடகவியலாளர்களுக்குப் பாதுகாப்பு அளிக்கப்பட வேண்டும் என்ற போதிலும், அடையாளம் தெரிந்தே இந்தத் தாக்குதல் நடத்தப்பட்டதாகக் குற்றச்சாட்டு எழுந்துள்ளது. இந்தச் சம்பவத்தை ஒரு “திட்டமிட்ட தாக்குதல்” என ரஷ்யா கடுமையாகச் சாடியுள்ளதுடன், ஊடக சுதந்திரத்தின் மீது நடத்தப்பட்ட அத்துமீறல் என்றும் தனது கண்டனத்தைப் பதிவு செய்துள்ளது.
இந்தச் சம்பவம் லெபனான் மற்றும் இஸ்ரேல் இடையே ஏற்கனவே நிலவி வரும் போர் பதற்றத்தை மேலும் அதிகரித்துள்ளது. போர்க்களத்தில் ஊடகவியலாளர்கள் குறிவைக்கப்படுவது சர்வதேச சமூகத்திடையே பெரும் அதிர்ச்சியை ஏற்படுத்தியுள்ளது. லெபனான் எல்லைப் பகுதிகளில் இஸ்ரேல் தனது தாக்குதல்களைத் தீவிரப்படுத்தி வரும் நிலையில், இந்த ஏவுகணைத் தாக்குதல் உலக நாடுகளின் கவனத்தை ஈர்த்துள்ளது.