கோவையில் புதைக்கப்பட்ட மீன் வியாபாரியின் உடலைத் தோண்டி எடுத்து, அவரது கழுத்தில் இருந்த 4 லட்சம் ரூபாய் மதிப்பிலான தங்க நகையைத் திருடிச் சென்ற அதிர்ச்சி உவட்டும் கொடுமை நடந்துள்ளது. கோவை சவுரிபாளையம் பகுதியைச் சேர்ந்த நாகராஜ் (60) என்ற மீன் வியாபாரி அண்மையில் உடல்நலக்குறைவால் உயிரிழந்தார். அவர் எப்போதும் ஆசையுடன் அணிந்திருக்கும் மீன் டாலர் பொறித்த மூன்றரை பவுன் தங்கச் சங்கிலியுடனேயே அவரது உடல் மாநகராட்சி மயானத்தில் அடக்கம் செய்யப்பட்டது.
நாகராஜின் 16-வது நாள் காரியத்திற்காக அவரது குடும்பத்தினர் மயானத்திற்குச் சென்றபோது, உடல் புதைக்கப்பட்ட இடத்தில் குழி தோண்டப்பட்டிருப்பது கண்டு அதிர்ச்சியடைந்தனர். இதுகுறித்து அங்கிருந்த மயான ஊழியர் கார்த்திகேயனிடம் விசாரித்தபோது, அவரும் அதே பகுதியைச் சேர்ந்த சக்திவேல் மற்றும் மணிகண்டன் ஆகிய இருவருடன் இணைந்து நள்ளிரவில் உடலைத் தோண்டி நகையைத் திருடியதை ஒப்புக்கொண்டார். நாகராஜின் இறுதிச்சடங்கில் பங்கேற்ற அண்டை வீட்டு இளைஞர்களான இவர்கள் இருவர், பணத் திண்டாட்டத்தால் இந்தத் துணிகரத் திருட்டில் ஈடுபட்டுள்ளனர்.
மயான ஊழியர் கார்த்திகேயனுக்கு 30,000 ரூபாய் பண ஆசை காட்டி, இவர்கள் மூவரும் சேர்ந்து உடலின் தலைப்பகுதி இருந்த இடத்தைத் தோண்டி நகையைத் திருடி விற்றுப் பணத்தைப் பங்கு போட்டுள்ளனர். இதுகுறித்து பாதிக்கப்பட்ட குடும்பத்தினர் அளித்த புகாரின் பேரில் போலீசார் வழக்குப் பதிவு செய்துள்ளனர். கோவையில் பெரும் பரபரப்பை ஏற்படுத்தியுள்ள இந்தச் சம்பவத்தில் தொடர்புடைய தலைமறைவான 3 பேரையும் போலீசார் தீவிரமாகத் தேடி வருகின்றனர்.