தமிழக சட்டப்பேரவையின் புதிய சபாநாயகரைத் தேர்ந்தெடுப்பதற்கான தேர்தல் நாளை நடைபெறவுள்ள நிலையில், தமிழக வெற்றிக் கழகத்தின் (தவெக) சார்பில் மூத்த தலைவர் ஜே.சி.டி. பிரபாகர் வேட்பாளராக அதிகாரப்பூர்வமாக அறிவிக்கப்பட்டுள்ளார். தவெகவின் முதற்கட்ட அமைச்சரவை பட்டியல் வெளியான போதே, அதில் அனுபவம் வாய்ந்த பிரபாகரின் பெயர் இடம்பெறாதது அரசியல் வட்டாரத்தில் பல்வேறு விவாதங்களை எழுப்பிய நிலையில், அவர் சபாநாயகர் பதவிக்கு முன்னிறுத்தப்படலாம் என்ற எதிர்பார்ப்பு தற்போது உறுதியாகியுள்ளது.
எதிர்க்கட்சிகள் தரப்பில் அவருக்கு எதிராகப் போட்டியிட வேட்பாளர் எவரும் அறிவிக்கப்படாத பட்சத்தில், ஜே.சி.டி. பிரபாகர் போட்டியின்றி ஒருமனதாகத் தேர்ந்தெடுக்கப்படுவார் என்பதால், நாளைய தேர்தல் முடிவுகள் தமிழக அரசியலில் மிகுந்த முக்கியத்துவம் பெற்றுள்ளன.