பீகார் மாநிலம் ஜமுய் மாவட்டத்தில் பள்ளிச் சிறுமி மற்றும் சிறுவன் தாக்கப்பட்ட வழக்கில், முக்கிய குற்றவாளியான நந்தன் யாதவ் காவல்துறை நடத்திய துப்பாக்கிச் சூட்டுக்கு பின் கைது செய்யப்பட்டுள்ளார். காவல்துறையினரின் இந்த அதிரடி நடவடிக்கையின் போது, மற்றொரு குற்றவாளியான ஹரே ராம் யாதவ் என்பவரும் கைது செய்யப்பட்டார். இந்த மோதலின் போது நந்தன் யாதவின் காலில் துப்பாக்கிச் சூட்டுக் காயமும், ஹரே ராமுக்கு எலும்பு முறிவும் ஏற்பட்டது. இணையத்தில் வைரலான வீடியோவின் அடிப்படையில் அடையாளம் காணப்பட்ட ஏழு சந்தேக நபர்களில், இதுவரை ஐந்து பேர் கைது செய்யப்பட்டுள்ளனர்.
பயிற்சி வகுப்பிலிருந்து வீடு திரும்பிய பத்தாம் வகுப்பு சிறுமி மற்றும் சிறுவனை ஒரு கும்பல் வழிமறித்து, மானபங்கம் செய்து தாக்கிய காட்சி சமூக வலைத்தளங்களில் பரவி பெரும் அதிர்ச்சியை ஏற்படுத்தியது. இதையடுத்து, பாதிக்கப்பட்ட சிறுமியின் அடையாளத்தை வெளிப்படுத்தி வீடியோவைப் பரப்பிய சமூக வலைத்தள கணக்குகள் மீது காவல்துறை கடுமையான நடவடிக்கையைத் தொடங்கியுள்ளது. போக்சோ சட்டம், தகவல் தொழில்நுட்பச் சட்டம் மற்றும் சிறுவர் நீதிச் சட்டத்தின் கீழ் சுமார் 120 சமூக வலைத்தள கணக்குகள் மீது வழக்குப் பதிவு செய்யப்பட்டுள்ளதாகவும், இதுவரை 132 கணக்குகளிலிருந்து அந்த வீடியோ அகற்றப்பட்டுள்ளதாகவும் ஜமுய் எஸ்பி விஷ்வஜித் தயாள் தெரிவித்துள்ளார்.
இச்சம்பவம் பீகார் அரசியலில் பெரும் கொந்தளிப்பை ஏற்படுத்தியுள்ளது. ஆளும் ஐக்கிய ஜனதா தளத்தின் (JD-U) மாநிலத் தலைவர் உமேஷ் குஷ்வாஹா மற்றும் அமைச்சர் சிரவண் குமார் ஆகியோர் இச்சம்பவத்தை ஒரு “சாதாரணச் சம்பவம்” எனக் குறிப்பிட்டது பெரும் சர்ச்சையை உருவாக்கியது. இதற்குக் கடும் எதிர்ப்பு தெரிவித்த எதிர்க்கட்சித் தலைவர் தேஜஸ்வி யாதவ், அம்மாநில துணை முதல்வர் சாம்ராட் சௌத்ரி ராஜினாமா செய்ய வேண்டும் என்று வலியுறுத்தினார். அதேவேளையில், 2005-க்கு முந்தைய ஆட்சிக் காலத்தைப் போலல்லாமல், தற்போது குற்றங்களில் ஈடுபடுபவர்கள் யாராக இருந்தாலும் அரசு உடனடியாக நடவடிக்கை எடுத்து வருவதாக ஆளுங்கட்சியினர் வாதிட்டனர்.
சர்ச்சை தீவிரமடைந்ததைத் தொடர்ந்து, உமேஷ் குஷ்வாஹா இச்சம்பவத்திற்கு கடும் கண்டனம் தெரிவித்ததுடன், இது வெட்கக்கேடான மற்றும் மனிதநேயமற்ற செயல் என்றும் விளக்கம் அளித்துள்ளார். எஞ்சியுள்ள குற்றவாளிகளைப் பிடிக்க சிறப்பு புலனாய்வுக் குழு (SIT) அமைக்கப்பட்டு தீவிர தேடுதல் வேட்டை நடைபெற்று வருகிறது. குற்றவாளிகள் எவரும் தப்ப முடியாது என்றும், பாதிக்கப்பட்ட குடும்பத்தினருக்குத் தேவையான அனைத்து பாதுகாப்பு வசதிகளும் முழுமையாக வழங்கப்படும் என்றும் பீகார் அரசு உறுதியளித்துள்ளது.