“அவரை அந்த சீட்ல உட்கார வச்சதே தப்பு”…. அத்திப்பழத்துப் புழு போன்ற அரசு…. முதலமைச்சர் விஜயை வெளுத்து வாங்கிய ஜேம்ஸ் வசந்தன்….!

தமிழக அரசியலில் முன்னணி நடிகரான விஜய், ‘தமிழக வெற்றிக் கழகம்’ என்ற கட்சியைத் தொடங்கி, 2026 சட்டமன்றத் தேர்தலில் தனித்துப் போட்டியிட்டு 108 தொகுதிகளில் மாபெரும் வெற்றி பெற்றார். சுமார் ஆறு தசாப்தகால தமிழக அரசியல் வரலாற்றில் இல்லாத மாற்றமாக, கூட்டணி கட்சிகளுக்கும் அமைச்சரவையில் பங்கு வழங்கி அதிகாரப் பகிர்வுடன் கூடிய ஆட்சியை அமைத்து முதலமைச்சராகப் பொறுப்பேற்றார். தவெகவின் இந்த அதிரடி அசுர வளர்ச்சியையும் விஜய் முதலமைச்சரானதையும் திமுக, அதிமுக, பாஜக உள்ளிட்ட பாரம்பரியக் கட்சிகளால் ஏற்றுக்கொள்ள முடியவிலை என்றும், அதன் காரணமாகவே அவர்கள் தொடர்ந்து இப்புதிய அரசு மீது கடுமையான விமர்சனங்களை முன்வைத்து வருகிறார்கள் என்றும் தவெக அமைச்சர்கள் பதிலடி கொடுத்து வருகின்றனர்.

அரசியல் களத்திற்கு அப்பாற்பட்டு திரைத்துறை சார்ந்த முக்கியப் பிரபலங்களான பா.ரஞ்சித், அமீர் மற்றும் இசையமைப்பாளர் ஜேம்ஸ் வசந்தன் போன்றோரும் புதிய தவெக அரசின் செயல்பாடுகளைத் தொடர்ந்து விமர்சித்து வருகின்றனர். இந்நிலையில் ஊடகம் ஒன்றுக்கு அளித்த பேட்டியில் பேசிய ஜேம்ஸ் வசந்தன், “இப்போதும் என் கணிப்பு பொய்க்கவில்லை; நான் நினைத்ததை விடவும் விஜய் மிகவும் மோசமாகச் செயல்படுகிறார். அவரை அந்த உயர்ந்த இடத்தில் அமர வைத்திருக்கவே கூடாது” எனத் தனது அதிருப்தியை வெளிப்படையாகப் பதிவு செய்துள்ளார்.

தொடர்ந்து பேசிய அவர், கடந்த மூன்று மாதகால தவெக ஆட்சியில் எந்தவொரு முன்னேற்றமும் மாற்றமும் நிகழவில்லை என்று சாடினார். “அரசு அதிகாரிகள் வழக்கம் போல் தங்கள் கடமைகளைச் செய்வதால்தான் அமைச்சுப் பணிகள் இயங்கிக் கொண்டிருக்கின்றனவே தவிர, புதிய அரசின் தனித்துவமான செயல்பாடு எதுவும் இல்லை. விஜயின் ஆட்சி என்பது அத்திப்பழத்துப் புழு போன்றது; பழம் மலரும் போதே அதற்குள் உருவாகும் புழு, அங்கேயே வாழ்ந்து மடிவது போல இந்த அரசும் பெயருக்கு உயிரோடு இருக்கிறதே தவிர, மக்களுக்கோ நாட்டிற்கோ இதனால் எந்தப் பயனும் இல்லை” என அதிரடியான ஒப்பிட்டுடன் தனது விமர்சனத்தை முடித்துள்ளார்.