இப்போ CSK வுக்காக ஆடல.. ஆனா 12 வருஷ அந்த பந்தம் விட்டு போகுமா..? ராஜஸ்தான் அணிக்காக ஆடும்போதும் சிஎஸ்கே நினைவால் கண்கலங்கிய ஜடேஜா..!!

ஐபிஎல் 2026 தொடரின் ஒரு பகுதியாக, மார்ச் 30-ம் தேதி கௌகாத்தியில் நடைபெற்ற ராஜஸ்தான் ராயல்ஸ் மற்றும் சென்னை சூப்பர் கிங்ஸ் (CSK) இடையிலான ஆட்டத்தின் போது, ராஜஸ்தான் அணியில் விளையாடும்  ரவீந்திர ஜடேஜா உணர்ச்சிவசப்பட்டு கண்கலங்கியதாக ஒரு புகைப்படம் சமூக வலைதளமான ‘X’-இல் (முன்னர் ட்விட்டர்) வைரலாகி வருகிறது. 12 ஆண்டுகளுக்கும் மேலாக சிஎஸ்கே அணியின் முக்கியத் தூணாகத் திகழ்ந்த அவர், தற்போது தனது முன்னாள் அணிக்கு எதிராக விளையாடியது ரசிகர்களிடையே பெரும் நெகிழ்ச்சியை ஏற்படுத்தியுள்ளது.

இந்த சீசனுக்கு முன்னதாக நடைபெற்ற மெகா ட்ரேடிங்கில், சிஎஸ்கே அணியின் ஜடேஜா மற்றும் சாம் கர்ரன் ஆகியோருக்குப் பதிலாக ராஜஸ்தான் அணியின் கேப்டனாக இருந்த சஞ்சு சாம்சன் சிஎஸ்கே-விற்கு மாற்றப்பட்டார். இது குறித்துப் பேசிய சிஎஸ்கே சிஇஓ காசி விஸ்வநாதன், ஜடேஜாவை விடுவிப்பது என்பது நிர்வாகம் எடுத்த மிகவும் கடினமான மற்றும் சவாலான முடிவுகளில் ஒன்று என்று தெரிவித்திருந்தார். அணியின் எதிர்காலத் தேவையைக் கருத்தில் கொண்டு எடுக்கப்பட்ட இந்த மாற்றத்தால், ரசிகர்கள் மட்டுமின்றி ஜடேஜாவும் ஒருவித உணர்ச்சிப் போராட்டத்திற்கு உள்ளாகியிருப்பதாகக் கருதப்படுகிறது.

போட்டியின் போது ஜடேஜா பீல்டிங் செய்த தருணங்களில் சிஎஸ்கே ரசிகர்கள் அவருக்கு ஆதரவாகக் குரல் கொடுத்தது, பழைய நினைவுகளை நினைவூட்டியதே அவரது இந்த நிலைக்குக் காரணம் எனப் பலரும் கருத்து தெரிவித்து வருகின்றனர். இருப்பினும், ஆட்டத்தில் தனது சிறப்பான பங்களிப்பை வழங்கிய அவர், 3 ஓவர்களில் 18 ரன்கள் மட்டும் விட்டுக்கொடுத்து 2 முக்கிய விக்கெட்டுகளை வீழ்த்தி ராஜஸ்தான் அணியின் வெற்றிக்கு உதவினார் என்பது குறிப்பிடத்தக்கது.