மத்திய கிழக்கில் நிலவி வரும் பதற்றத்தைத் தணிக்க அமெரிக்காவின் மத்தியஸ்தத்துடன் இஸ்ரேல் மற்றும் லெபனான் அரசுகளுக்கு இடையே தற்காலிக போர்நிறுத்த ஒப்பந்தம் எட்டப்பட்டு, அது நீட்டிக்கப்பட்டும் வந்தது. இருப்பினும், இந்த உடன்படிக்கையை மீறி லெபனானின் தெற்கு மற்றும் மத்திய பகுதிகளில் இஸ்ரேல் ராணுவம் தொடர் வான்வழித் தாக்குதல்களை நடத்தி வருகிறது. ஹிஸ்புல்லா அமைப்பினரைக் குறிவைத்து நடத்தப்படுவதாகக் கூறப்படும் இத்தாக்குதல்கள், எல்லையோரக் கிராமங்களில் பெரும் பதற்றத்தை ஏற்படுத்தியுள்ளது.
தெற்கு லெபனானில் உள்ள சக்ஸகியே, நபதியே மற்றும் டயர் உள்ளிட்ட பல்வேறு நகரங்களில் இஸ்ரேல் நடத்திய வான்வழி மற்றும் ட்ரோன் (ஆளில்லா விமானம்) தாக்குதல்களில் பெண்கள், குழந்தைகள் உட்பட 16 பேர் பரிதாபமாக உயிரிழந்துள்ளனர். மேலும் பலர் படுகாயமடைந்து மருத்துவமனையில் அனுமதிக்கப்பட்டுள்ளனர். இந்தத் தாக்குதல்களில் குடியிருப்பு கட்டடங்கள் தரைமட்டமாக்கப்பட்டதுடன், உள்ளூர் பள்ளி ஒன்றும் பலத்த சேதமடைந்துள்ளதாக லெபனான் சுகாதார அமைச்சகம் தெரிவித்துள்ளது.
இஸ்ரேலின் இந்த தீவிரத் தாக்குதலுக்குப் பதிலடியாக, லெபனானின் ஹிஸ்புல்லா அமைப்பும் இஸ்ரேலிய ராணுவ நிலைகளைக் குறிவைத்து ஏவுகணைகள் மற்றும் ட்ரோன்கள் மூலம் தாக்குதல் நடத்தி வருகிறது. அமைதிப் பேச்சுவார்த்தைகள் ஒருபுறம் நடந்து கொண்டிருந்தாலும், எல்லையில் தினசரி நிகழும் இந்தத் துப்பாக்கிச் சூடு மற்றும் குண்டுவெடிப்புகளால் போர்நிறுத்த ஒப்பந்தம் முழுமையாக முறியும் அபாயம் ஏற்பட்டுள்ளது. இதுவரை லட்சக்கணக்கான லெபனான் மக்கள் தங்கள் வீடுகளை விட்டு வெளியேறி அகதிகளாக இடம்பெயர்ந்துள்ளனர்.