காலையிலேயே ஒலிக்கும் மரணஓலம்…. 111 பிஞ்சுக் குழந்தைகள் உட்பட 912 பேர் பலி… உலகையே உலுக்கும் சோகம்….!

கடந்த இரண்டு வாரங்களாக லெபனான் மீது இஸ்ரேல் நடத்தி வரும் தீவிர வான்வழித் தாக்குதல்களில் உயிரிழந்தவர்களின் எண்ணிக்கை 912-ஆக உயர்ந்துள்ளது பெரும் அதிர்ச்சியை ஏற்படுத்தியுள்ளது. லெபனான் சுகாதார அமைச்சகம் வெளியிட்டுள்ள சமீபத்திய அறிக்கையின்படி, மார்ச் 2-ஆம் தேதி முதல் நடைபெற்று வரும் இந்தத் தாக்குதல்களில் பலியானவர்களில் 111 குழந்தைகள், 67 பெண்கள் மற்றும் 38 மருத்துவப் பணியாளர்கள் அடங்குவர். மேலும், இந்தத் தொடர் தாக்குதல்களில் இதுவரை 2,221-க்கும் மேற்பட்டோர் காயமடைந்துள்ளனர். தெற்கு லெபனான் மற்றும் பெய்ரூட்டின் புறநகர் பகுதிகளில் உள்ள குடியிருப்புப் பகுதிகளை இலக்கு வைத்து நடத்தப்படும் இந்தத் தாக்குதல்களால் உள்கட்டமைப்புகள் கடுமையாகச் சேதமடைந்துள்ளன.

இந்த போர்ச் சூழல் காரணமாக லெபனானில் இதுவரை சுமார் 10 லட்சம் மக்கள் தங்கள் வீடுகளை விட்டு வெளியேறி இடம்பெயர்ந்துள்ளனர், இது அந்நாட்டின் மொத்த மக்கள் தொகையில் சுமார் 19 சதவீதமாகும். இஸ்ரேலிய ராணுவம் தனது தரைவழித் தாக்குதலை தெற்கு லெபனானில் விரிவுபடுத்தி வரும் நிலையில், அங்குள்ள 600-க்கும் மேற்பட்ட முகாம்களில் மக்கள் தஞ்சம் புகுந்துள்ளனர். ஐக்கிய நாடுகள் சபை மற்றும் உலக சுகாதார அமைப்பு (WHO) இந்த மனிதாபிமான நெருக்கடி குறித்து கடும் கவலை தெரிவித்துள்ளன. குறிப்பாக, மருத்துவமனைகள் மீதான தாக்குதல்களால் காயமடைந்தவர்களுக்குச் சிகிச்சை அளிப்பதில் பெரும் சிக்கல் ஏற்பட்டுள்ளதோடு, பிராந்தியத்தில் அமைதியற்ற சூழல் தொடர்ந்து நீடித்து வருகிறது.